آپ کے پسندیدہ اشعار!

[سیما علی]

شراب حسن نزاکت جو پاس ہے اس کے
اُسی شراب کی حوروں نے پائی ہے تلچھٹ

(انشا)

 

[سیما علی]

اے نزاکت ترے پردے میں انہیں رحم آئے
وہ کہیں ہم سے گلے پر نہیں خنجر پھرتا

(نارائن پرشاد ورما)

 

[سیما علی]

ناز ہے گل کو نزاکت پہ چمن میں اے ذوق
اس نے دیکھے ہی نہیں‘ ناز و نزاکت والے

(ذوق)

 

[شمشاد]

خوف ناکامی ہے جب تک کامیابی ہے محال
مشکلیں جب بندھ گئیں ہمت سب آساں ہو گئیں
اسماعیل میرٹھی

 

[احسن جاوید]

وہ ملے تو یہ پوچھنا ہے مجھے
اب بھی ہوں میں تری امان میں کیا
(جون ایلیاء)

 

[احسن جاوید]

ہم تو سمجھے تھے کہ ہم بھول گئے ہیں ان کو
کیا ہوا آج یہ کس بات پہ رونا آیا

کس لیے جیتے ہیں ہم کس کے لیے جیتے ہیں
بارہا ایسے سوالات پہ رونا آیا

(ساحر لدھیانوی)

 

[احسن جاوید]

ابھی ابھی تو جدائی کی شام آئی تھی
ہمیں عجیب لگا زندگی کا ڈھل جانا
(احمد فراز)

 

[سیما علی]

متاعِ درد سے دل مالا مال ہے میرا
زمانہ کیوں یہ سمجھتا ہے کہ تنگ دست ہوں میں

ساقی امرووہوی

 

[سیما علی]

واقف ہے خوب جھوٹ کے فن میں یہ آدمی
یہ آدمی ضرور سیاست میں جائے گا۔

راحت اندوری

 

[سیما علی]

نہ کرتے شور شرابہ تو اور کیا کرتے
تمہارے شہر میں کچھ اور کام کاج بھی ہو

ندا فاضلی

 

[سیما علی]

دھوپ میں نکلو گھٹاؤں میں نہا کر دیکھو
زندگی کیا ہے کتابوں کو ہٹا کر دیکھو

ندا فاضلی

 

[سیما علی]

اِک زخم تھا،کہ وقت کے ہاتھوں سے بھر گیا
کیا پُوچھتے ہیں آپ،کسی مہرباں کی بات

عبدالحمید عدم

 

[سیما علی]

کسی کو فکر نہیں قوم کے مسائل کی
ریا کی جنگ ہے بس حاشیہ نشینوں میں
حبیب جالب

 

[سیما علی]

قید میں اتنا زمانہ ہو گیا
اب قفس بھی آشیانہ ہو گیا

حفیظ جونپوری

 

[سیما علی]

ہم نشیں حاصل اسیری میں بھی آرام ہے۔
خانہ صیاد ہے کنج قفس ہے دام ہے۔

اشک بنارسی

 

[سیما علی]

ہم مصلحتِ وقت کے قائل نہیں یارو
الزام جو دینا ہو سرِ عام دیا جائے
محسن بھوپالی.

 

[سیما علی]

تم میرے لیے اب کوئی الزام نہ ڈھونڈو
چاہا تھا تمہیں اک یہی الزام بہت ہے

ساحر لدھیانوی

 

[سیما علی]

دوسروں کا درد اخترؔ میرے دل کا درد ہے
مبتلائے غم ہے دنیا اور میں غم خوار ہوں

اختر انصاری

 

[سیما علی]

پہلو میں میرے دل کو نہ، اے درد! کر تلاش
مدت ہوئی تباہی کا مارا سفر میں ہے

امیر مینائ

 

[سیما علی]

ہر دم جو خونِ تازہ مری چشمِ تر میں ہے
ناسور دل میں ہے کہ الٰہی جگر میں ہے

امیر مینائی