آپ کے پسندیدہ اشعار!

[طارق شاہ]

اک سبک اور حسِیں کار ابھی گزُری ہے
گُنگُناتی ہوئی سرشار ابھی گزُری ہے

سُن رہا ہوں دلِ گیتی کے دھڑکنے کی صدا
خالقِ حُسن کی شہکار ابھی گزُری ہے

اسرارالحق مجاز

 

[طارق شاہ]

یہ مانا آج دل فرطِ الم سے پارا پارا ہے
بُلندی دیکھنے والے کو پستی بھی گوارہ ہے

ہزاروں کے لئے میں گر چُکا ہوں بامِ گردوں سے
ہزاروں وہ ہیں جن کومیں نے گردوں سے اُتارا ہے

اسرارالحق مجاز

 

[طارق شاہ]

زندگی ساز دے رہی ہے مجھے
سحر و اعجاز دے رہی ہے مجھے

اور بہت دُور آسمانوں سے
موت آواز دے رہی ہے مجھے

اسرارالحق مجاز

 

[طارق شاہ]

کھائیے گا اِک نِگاہِ لُطف کا کب تک فریب
کوئی افسانہ بناکر بد گماں ہو جائیے گا

اسرارالحق مجاز

 

[طارق شاہ]

خُدایا کون یہ تکیہ پہ میرے لکھ گیا آکر
تِرا سر رنجِ بالیں ہے، تِرا تن بارِ بستر ہے

راجہ مہدی علی خاں

 

[طارق شاہ]

کوشش کروں ہزار نہ آئے گی مجھ کو نیند
تکیہ ہے نرم ، بیوی کا برتاؤ سخت ہے

راجہ مہدی علی خاں

 

[طارق شاہ]

آنکھوں کی اندھی خود غرضی کاہے کو سمجھنے دیگی کبھی
جو نیند اُڑا دے راتوں کی ، وہ خواب میں آنا کیا جانے

آرزو لکھنوی

 

[طارق شاہ]

تھا محبت بھری اِک سانس کا وقفہ کتنا
اتنی ہی دیرمیں سو بار حیا آ کے گئی

آرزو لکھنوی

 

[طارق شاہ]

کیا بنا دیگا نجانے تجھے بڑھتا ہُوا حُسن
نازسِکھلاتی گئی، جو بھی ادا آ کے گئی

آرزو مستئ شب بن کے رہا، دن کا خُمار
جُھومتی جب کوئی متوالی گھٹا آ کے گئی

آرزو لکھنوی

 

[طارق شاہ]

اس طُولِ خاموشی کا زورِ بیاں بھی دیکھا
تھی بات میرے دل کی، نِکلی تِری زباں سے

آرزو لکھنوی

 

[طارق شاہ]

ہم جس پہ مر رہے ہیں وہ ہے بات ہی کچھ اور
عالم میں تجھ سے اور سہی، تُو مگر کہاں

الطاف حسین حالی

 

[طارق شاہ]

رنج سے خُوگر ہُوا اِنساں، تو مِٹ جاتا ہے رنج
مُشکلیں اتنی پڑیں مجھ پر ، کہ آساں ہو گئیں

مرزا غالب

 

[طارق شاہ]

اب تو گھبرا کے یہ کہتے ہیں کہ مرجائیں گے
مر کے بھی چین نہ پایا ، تو کدھر جائیں گے

شیخ ابراہیم ذوق

 

[طارق شاہ]

شب فرقت تو بسر ہو، یا رب
صبح کو روزِ قیامت ہی سہی

میر مہدی مجروح

 

[طارق شاہ]

جو اُٹّھے ہیں تو گرمِ جُستجوئے دوست اٹّھے ہیں
جو بیٹھے ہیں، تو محوِ آرزوئے یار بیٹھے ہیں

مقامِ دستگیری ہے، کہ تیرے رہروِ اُلفت
ہزاروں جستجوئیں کرکے ہمّت ہار بیٹھے ہیں

آزاد انصاری (سہارنپوری)

 

[طارق شاہ]

اُمیدِ سکوں رُخصت، تسکینِ دروں رُخصت
اب درد کی باری ہے، اب درد مزہ دے گا

اِک روز دلِ رہزن ، خود راہ نُما ہوگا
اِک روز یہی دُشمن منزِل کا پتہ دے گا

آزاد انصاری (سہارنپوری)

 

[طارق شاہ]

تم چاہو تو دو لفظوں میں طے ہوتے ہیں جھگڑے
کچُھ شکوے ہیں بیجا مِرے ، کچُھ عُذر تمھارے

محمد علی خاں اثر (رامپوری)

 

[طارق شاہ]

حُسن اُدھر مست، اِدھرعشق کو کچُھ ہوش نہیں
اب کوئی شے نہیں، جو میکدہ بردوش نہیں

چشمِ مِیگوں نے کِیا ایک ہی جلوے میں خراب
کِس کو اب دیکھوں، کہ اپنا ہی مجھے ہوش نہیں

محمد علی خاں اثر

 

[طارق شاہ]

ہٹ گئی خود، کہ ہٹا لی گئی چہرے سے نقاب
بات کچھ ہو، مگر اب تک وہ فراموش نہیں

کیا چھپائے گی، اثر! حُسن کے جلوے کو نقاب
برق بادل میں نہاں رہ کے بھی روپوش نہیں

محمد علی خاں اثر

 

[طارق شاہ]

میکش نے کہا نشّہ تو صُوفی نے کہا وجد
حال اپنا تماشا ہے اثر، فرقِ نظر سے

محمد علی خاں اثر