جی ہاں قصہ کچھ یوں ہے کہ حضرت زبیر بن عوامؓ اس وقت ۱۲ سال کے تھے ایک دن انھوں نے اچانک یہ شیطانی آواز سنی کہ حضورﷺ کو قتل کر دیا گیا ہے ( ایک اور روایت کے مطابق حضورﷺ کو گرفتار کر لیا گیا ہے )۔ یہ سنتے ہی آپ ننگی تلوار لیے مکہ کی گلیوں میں حضورﷺ کی تلاش میں دوڑتے ہوئے نکلے کہ اچانک ان سے سامنا ہو گیا۔ حضورؐ نے پوچھا تمہیں کیا ہوا؟ حضرت زبیرؓ نے جواب دیا کہ میں نے سنا آپ کو گرفتار کر لیا گیا ہے۔ حضورؐ نے پوچھا پھر تم کیا کرنے لگے تھے؟ حضرت زبیرؓ نے کہا کہ میں آپ کو کو گرفتار کرنے والوں کو اپنی تلوار سے مارنے نکلا تھا۔ اس پر حضورؐ نے آپ اور آپ کی تلوار کے حق میں دعا فرمائی اور کہا کہ واپس چلے جاؤ یہ پہلی تلوار ہے جو اللہ کے راستے میں سونتی گئی۔
