اشعار - حروف تہجی کے لحاظ سے

[سیما علی]

کس کس کو بتائیں گے جدائی کا سبب ہم
تو مجھ سے خفا ہے تو زمانے کے لئے آ
احمد فراز

 

[شمشاد]

گزرے ہزار بادل پلکوں کے سائے سائے
اترے ہزار سورج اک شہ نشین دل پر
احمد مشتاق

 

[سیما علی]

لاکھ چاہا ہم نے اس کو بھول جائیں پر قتیل
حوصلے اپنی جگہ ہیں، بے بسی اپنی جگہ

 

[شمشاد]

میرا ہر شعر حقیقت کی ہے زندہ تصویر
اپنے اشعار میں قصہ نہیں لکھا میں نے
انور جلال پوری

 

[سیما علی]

نہ ہو یہ وقت پیامِ بقا کے آنے کا!
لہذا کھول کے رکھو کواڑ عمروں کا

 

[شمشاد]

وا ہوتے ہیں مستی میں خرابات کے اسرار
رندی مرا ایمان ہے مستی ہے مرا فرض
ساحر دہلوی

 

[سیما علی]

ہیں بھی ایسے کہ فقط مجھ کو نظر آتے ہیں
ایک ہی دوسرے میں الجھے ہوئے چاروں طرف

ظفر اقبال

 

[شمشاد]

یارب چمنِ نظم کو گلزارِ اِرم کر
اے ابرِ کرم خشک زراعت پہ کرم کر

تو فیض کا مبدا ہے توجہ کوئی دَم کر
گمنام کو اعجاز بیانوں میں رقم کر
(میر انیس)

 

[سیما علی]

اُداس شب میں، کڑی دوپہر کے لمحوں میں
کوئی چراغ، کوئی صورتِ گلاب اُترے

 

[شمشاد]

بھیک میں بھی مانگو تو کوئی پیار نہ ڈالے جھولی میں
بن مانگے مل جاتے ہیں رسوائی کے سامان یہاں
قتیل شفائی

 

[سیما علی]

پہلے سے مراسم نہ سہی پھر بھی کبھی تو
رسم و رہِ دنیا ہی نبھانے کے لئے آ
فراز

 

[سیما علی]

تمہیں بھُلانا ہی اول تو دسترس میں نہیں !
جو اختیار بھی ہوتا تو کیا بھُلا دیتے ؟

 

[گُلِ یاسمیں]

ٹوٹا تو ہوں مگر ابھی بکھرا نہیں فراز
میرے بدن پہ جیسے شکستوں کا جال ہو

 

[گُلِ یاسمیں]

ثمر بھی ہے کبھی قسمت میں کیا حساب لگانا
ہمیں تو باغ تماشا ہے خواب خواب لگانا

 

[سیما علی]

جو اک لفظ کی خوشبو نہ رکھ سکا محفوظ
میں اس کے ہاتھ میں ساری کتاب کیا دیتا

 

[شمشاد]

چپکے چپکے اٹھ رہا ہے مدھ بھرے سینوں میں درد
دھیمے دھیمے چل رہی ہیں عشق کی پروائیاں
فراق گورکھپوری

 

[سیما علی]

حصولِ دید سے مشروط کب ہے جذبہءِ دل
ہمیں تو پیار تیرے نام پر بھی آتا ہے

 

[شمشاد]

خیال یار کے روشن دیے کرو ورنہ
اندھیری رات میں منزل کا اعتبار نہیں
جے کرشن چودھری حبیب

 

[سیما علی]

دل دے تو اس مزاج کا پروردگار دے
جو رنج کی گھڑی بھی خوشی سے گزار دے
داغ دہلوی

 

[سیما علی]

ڈھونڈتا ہے عدم انہیں اب کیا
وہ تو دل میں سمائے بیٹھے ہیں