اشعار - حروف تہجی کے لحاظ سے

[سیدہ شگفتہ]

لگی تنہائیوں میں جب کبھی دل کی عدالت
تو پھر میں اپنی ہی خود مخبری کرتا ہوں

(کلام : عارف شفیق)

 

[شمشاد]

میں جُرم کا اعتراف کر کے
کچھ اور ہے جو چھپا گیا ہوں
(جون ایلیا)

 

[سیدہ شگفتہ]

نہ جانے پی گیا ہے کتنے دریا
سمندر آج بھی پیاسا بہت ہے

(تنویر پھول)

 

[سیدہ شگفتہ]

وہ کون ہے جو جھوٹ کبھی بولتا نہیں
سچ بولتے ہیں ہم تو کوئی پوچھتا نہیں

(سرفراز عابدی)

 

[سارہ خان]

وہ میرا جانِ ہر محفل کہاں ہے
نگاہِ شوق کی منزل کہاں ہے

ستارو، تم نے دیکھا ہو تو لادو
مری اُمید کا حاصل کہاں ہے
(ساغر نظامی)

 

[سارہ خان]

ہے میخانہ حقیقت ہی حقیقت
یہاں بحثِ حق و باطل کہاں ہے

(ساغر نظامی)

 

[سیدہ شگفتہ]

ہم کو طوفان سے لڑنے کا ہنر آتا ہے
آپ ساحل پہ کھڑے ہو کے تماشا دیکھیں

(رشدہ عیاں)

 

[سارہ خان]

یہ کہہ کے اُٹھ گئے ہنگامِ نزع سے رفیق
یہ راہ وہ ہے کوئی ساتھ جا نہیں سکتا
(اکبر الٰہ آبادی)

 

[شمشاد]

آج کا دن نہیں شراب کا دن
آج ہے جون زہرِ ناب کا دن
(جون ایلیا)

 

[سارہ خان]

بندگی ہم نے تو جی سے، اپنی ٹھانی آپ کی
بندہ پرور خیر، آگے مہربانی آپ کی
(انشا اللہ خان انشا)

 

[شمشاد]

پیار کا پہلا خط لکھنے میں وقت تو لگتا ہے
نئے پرندوں کو اُڑنے میں وقت تو لگتا ہے

 

[عمر سیف]

تخلیِق کائنات کے دلچسپ جرم پر
ہنستا تو ہوگا خود بھی یزداں کبھی کبھی

 

[شمشاد]

ٹکرا ہی گئی میری نظر ان کی نظر سے
دھونا ہی پڑا ہاتھ مجھے قلب و جگر سے
(فیاض ہاشمی)

 

[عمر سیف]

ثبوت مانگ رہے ہو میری تباہی کا
مجھے تباہ کیا جِن کی کج ادائی نے

 

[شمشاد]

​

جس پہ شاعر کی نگاہیں ہی پہنچ سکتی ہیں​

چاند تاروں سے پرے ایسی زمیں اور بھی ہے​

(ضیا فتح آبادی)​

 

[سیدہ شگفتہ]

چراغوں کو آنکھوں میں محفوظ رکھنا
بڑی دور تک رات ہی رات ہو گی

(بشیر بدر)

 

[شمشاد]

​

حصول آگہی کے وقت کاش اتنی خبر ہوتی​

کہ یہ وہ آگ ہے جس آگ میں زندہ جلوں گا میں​

(انور شعور)​

 

[عمر سیف]

خون ِ دل صرف کرنا پڑتا ہے
دیکھنا!تم نہ شاعری کرنا
کتنا دُشوار ہے انا کے لیے
سارے ماحول کی نفی کرنا

 

[شمشاد]

​

دن رات ہوئے ہم وقفِ رفو اب کیا محفل کیا فکرسخن​

یہ ہات رکیں تو سوچیں بھی یہ زخم سلیں تو لکھیں بھی​

 

[عمر سیف]

ڈھلتا سورج ، پھیلا جنگل ، رستہ گم
ہم سے پوچھو ، کیسا عالم ہوتا ہے