اشعار - حروف تہجی کے لحاظ سے

[سیما علی]

فکر ہي ٹھہری تو دل کو فکر ِ خوباں کيوں نہ ہو
خاک ہونا ہے تو خاک ِ کوئے جاناں کيوں نہ ہو

جوش ملیح آبادی

 

[سیما علی]

قفس میں ذکرِ نشیمن گناہِ بے لذّت
نہ ہم زباں، نہ کوئی ہم خیال ہوتا ہے

یاس، یگانہ، چنگیزی

 

[سیما علی]

کتنے شوریدہ سر محبت میں
ہو گئے کوچۂ صنم کی خاک

قابل اجمیری

 

[سیما علی]

گو واں نہیں ، پہ واں کے نکالے ہوئے تو ہیں
کعبے سے ان بتوں کو نسبت ہے دور کی
غالب

 

[سیما علی]

لوٹ آئے نہ کسی روز وہ آوارہ مزاج
کھول رکھتے ہیں اسی آس پہ در شام کے بعد


فرحت عباس شاہ

 

[سیما علی]

مجھ کو شکستِ دل کا مزا یاد آ گیا
تم کیوں اداس ہو کیا یاد آ گیا؟

 

[سیما علی]

نہ کوئی شعر، نہ کوئی غزل، نہ نام تیرا
قلم کی نوک پہ کیسا سکوت طاری ہے

 

[سیما علی]

وسعتِ رحمتِ حق دیکھ کہ بخشا جائے
مجھ سا کافرکہ جو ممنونِ معاصی نہ ہوا

 

[سیما علی]

ہم فقیروں سے بے ادائی کیا
آن بیٹھے جو تم نے پیار کیا
میر تقی میر

 

[سیما علی]

یہی فرماتے رہے تیغ سے پھیلا اسلام
یہ نہ ارشاد ہوا توپ سے کیا پھیلا ہے
اکبر الہ آبادیؒ

 

[گُلِ یاسمیں]

اس دور میں خلوص کا کیا کام اے شکیبؔ
کیوں کر چلے بساط پہ مہرا پِٹا ہوا

 

[گُلِ یاسمیں]

باقی ہے یہی ایک نشاں موسمِ گل کا
جاری رہے گلشن میں بیاں موسمِ گل کا

 

[گُلِ یاسمیں]

پہچانتے نہیں اسے محفل میں دوست بھی
چہرہ ہو جس کا گردِ الم سے اٹا ہوا

 

[گُلِ یاسمیں]

تو وہی ہے جو مرے دل میں چھپا بیٹھا ہے
اک یہی راز کبھی مجھ پہ عیاں کیوں نہ ہوا

 

[گُلِ یاسمیں]

ٹھہرو ٹھہرو مرے اصنامِ خیالی ٹھہرو
میرا دل گوشۂِ تنہائی میں گھبرائے گا

 

[گُلِ یاسمیں]

ثبوت ہے یہ محبت کی سادہ لوحی کا
جب اس نے وعدہ کیا میں نے اعتبار کیا

 

[گُلِ یاسمیں]

جمی رہے گی نگاہوں پہ تیرگی دن بھر
کہ رات خواب میں تارے اتر کے آئے بہت

 

[گُلِ یاسمیں]

چہرے بدل بدل کے مجھے مل رہے ہیں لوگ
اتنا بُرا سلوک میری سادگی کے ساتھ

 

[گُلِ یاسمیں]

حسن اور عشق کو دے طعنۂ بیداد مجاز
تم کو تو صِرف اِسی بات پہ مر جانا تھا

 

[شمشاد]

خیال یار سدا چشم نم کے ساتھ رہا
مرا جو چاہ میں دم تھا وہ دم کے ساتھ رہا
نظیر اکبرآبادی