اشعار کا سلسلہ،حروف ِ تہجی سے

[شمشاد]

کسی دھوپ کے نگر میں میرا ساتھ چھوڑ جانا
کبھی میرا عکس بن کر میرے آئینے میں رہنا

 

[عمر سیف]

گرمیِ حسرتِ ناکام سے جل جاتے ہیں
ہم چراغوں کی طرح شام سے جل جاتے ہیں

 

[شمشاد]

لیتے ہی دل جو عاشقِ دل سوز کا چلے
تم آگ لینے آئے تھے کیا آئے کیا چلے
(ابراھیم ذوق)

 

[الف عین]

میں نے چاہا تھا کہ اندوہِ وفا سے چھوٹوں
وہ ستمگر مرے مرنے پہ بھی راضہی نہ ہوا

 

[شمشاد]

نہ جس کی شکل ہے کوئی، نہ جس کا نام ہے کوئی
اک ایسی شئے کا کیوں ہمیں ازل سے انتظار ہے
(شہریار)

 

[سارہ خان]

وہ ساتھ تھا تو خدا بھی تھا مہرباں کیا کیا
بچھڑ گیا تو ہوئی ہیں عداوتیں کیسی ۔۔۔

 

[شمشاد]

ہے دستِ رد بسیرِ جہاں بستنِ نظر
پائے ہوس بہ دامنِ مژگاں کشیدہ ہوں
(غالب)

 

[سارہ خان]

یہ کیسی بات کہی شام کے ستارے نے

کہ چَین دل کو مِرے رات بھر نہیں آیا

ہمیں یقین ہے امجد نہیں وہ وعد ہ خلاف

پہ عُمر کیسے کٹے گی ، اگر نہین آیا

 

[شمشاد]

اب پھر الف سے

اے یادِ دوست آج تو جی بھر کے دل دکھا
شاید یہ رات ہجر کی آئے نہ پھر کبھی
(ناصر کاظمی)

 

[عمر سیف]

بادل فضا میں آپ کی تصویر بن گئے
سایہ کوئی خیال سے گزرا تو رو دئیے

 

[عیشل]

پنکھڑی پر تھا ایک قطرہ سا
پھول کا خواب تھا کہ دل ٹوٹا

 

[شمشاد]

تیرا ہی بحر سفینہ رواں بھی تیرا ہے
بھنور بھی تیرا ہے اور بادباں بھی تیرا ہے
(مظہر امام)

 

[عمر سیف]

ٹپک اے شمع آنسو بن کر پروانے کی آنکھوں سے
سراپا درد ہوں حسرت بھری ہے داستاں میری

 

[شمشاد]

ث سے معذرت

جب لگے زخم تو قاتل کو دعا دی جائے
ہے یہی رسم تو یہ رسم اٹھا دی جائے
(جان نثار اختر)

 

[سارہ خان]

چارہ سازوں سے الگ ہے میرا معیار کہ میں
زخم کھاؤں گا تو کچھ اور نکھر جاؤں گا!

 

[شمشاد]

حیراں ہیں لب بستہ ہیں دلگیر ہیں غنچے
خوشبو کی زبانی تیرا پیغام ہی آئے
(ادا بدایونی)

 

[عمر سیف]

خاموشی کا حاصل بھی اِک لمبی سی خاموشی ہے
اُن کی بات سنی بھی ہم نے اپنی بات سنائی بھی

 

[شمشاد]

دل کی چوکھٹ پے جو اک چراغ جلا رکھا ہے
تیرے لوٹ آنے کا امکان سجا رکھا ہے

 

[عمر سیف]

ڈرا دیتی ہے جن کو انقلابِ وقت کی پائل
انہیں کیوں کر میں سمجھاؤں کہ رقصِ ارتقاء کیا ہے

 

[شمشاد]

ذکرِ شبِ فراق سے وحشت اسے بھی تھی
میری طرح کسی سے محبت اسے بھی تھی
(محسن نقوی)