بیت بازی کا کھیل!

[کاشفی]

ہوں۔۔نوں غنا ۔۔نون۔۔۔اوکے

نہیں ہچکی پہ ہچکی شام سے اک دم ٹھہرتی ہے
ترے بیمارِ غم کو موت شاید یاد کرتی ہے
(ذوق)

 

[شمشاد]

یہ ملی کس جرم پر دم کو سزا؟
حکم ہے دن بھر چلے شب بھر چلے
(امیر مینائی)

 

[محمد وارث]

یوں جو تکتا ہے آسماں کو تُو
کوئی رہتا ہے آسمان میں کیا؟

یہ مجھے چین کیوں نہیں پڑتا
ایک ہی شخص تھا جہان میں کیا

(جون ایلیا)

 

[شمشاد]

اے شخص اب تو مجھ کو سبھی کچھ قبول ہے
یہ بھی قبول ہے کہ تجھے چھین لے کوئی
(جون ایلیا)

 

[یونس عارف]

یہ ضد کہ آج نہ آوے ، اور آئے بِن نہ رہے
قضا سے شکوہ ہمیں کِس قدر ہے ، کیا کہیے!

رہے ہے یوں گِہ و بے گہِ ، کہ کُوئے دوست کو اب
اگر نہ کہیے کہ دشمن کا گھر ہے ، کیا کہیے!​

غالب

 

[شمشاد]

یہ نہ تھی ہماری قسمت کہ وصال یار ہوتا
اگر اور جیتے رہتے یہی انتظار ہوتا
(چچا)

 

[محمد وارث]

آ کے سجّادہ نشیں قیس ہوا میرے بعد
نہ رہی دشت میں خالی کوئی جا میرے بعد

(میر)

 

[شمشاد]

دردِ دل کے واسطے پیدا کیا ہے انساں کو
ورنہ طاعت کے لیے کچھ کم نہ تھے کرو و بیاں
(علامہ)

 

[فرخ منظور]

دردِ دل کے واسطے پیدا کیا ہے انساں کو
ورنہ طاعت کے لیے کچھ کم نہ تھے کرو و بیاں
(علامہ)

یہ شعر علامہ کا نہیں شاید حالی کا ہے۔ اور میرے خیال میں صحیح شعر یوں ہے۔
دردِ دل کے واسطے پیدا کیا انسان کو
ورنہ طاعت کے لئے کچھ کم نہ تھے کرّ و بیاں

اب ن سے شعر

نہ آتے ہمیں اس میں تکرار کیا تھی
مگر وعدہ کرتے ہوئے عار کیا تھی
(علامہ اقبال)

 

[محمد وارث]

یہ کہاں کی دوستی ہے، کہ بنے ہیں دوست ناصح
کوئی چارہ ساز ہوتا، کوئی غم گسار ہوتا

(غالب)

 

[شمشاد]

اب ٹوٹ گریں گی زنجیریں اب زندانوں کی خیر نہیں
جو دریا جھوم کے اٹھے ہیں تنکوں سے نہ ٹالے جائیں گے
(فیض)

 

[الف عین]

نہ ہم سمجھے نہ آپ آئے کہیں سے
پسینہ پونچھئے اپنی جبیں سے
مومن

 

[راجہ صاحب]

یہ نفرتوں کی فصیلیں جہالتوں کے حصار
نہ رہ سکیں گے ہماری صدا کے رستےمیں
(حبیب جالب)

 

[شمشاد]

اعجاز بھائی یہ آپ نے ن سے شعر کس کے جواب میں دے دیا؟

یہ اس نے دیکھا تھا اک رقصِ ناتمام کے بعد
وفورِ شوق میں کون و مکاں تھرک رہے تھے
(عزیز نبیل)

 

[محمد وارث]

یوں اُٹھے آہ اُس گلی سے ہم
جیسے کوئی جہاں سے اُٹھتا ہے

(میر)

 

[شمشاد]

یہ کہہ کر دیئے میری قسمت میں نالے
تمہاری امانت تمہارے حوالے
(قمر جلالوی)

 

[خوشی]

یوں غم نے ترے کر دیا گریہ مرا روشن
اشکوں کی جگہ آنکھوں سے جگنو نکل آئے

 

[شمشاد]

یہ شیشی یہ سپنے یہ رشتے یہ دھاگے
کسے کیا خبر ہے کہاں ٹوٹ جائیں
(سدرشن فاخر)

 

[فرخ منظور]

نازکی اس کے لب کی کیا کہیے
پنکھڑی اک گلاب کی سی ہے
(میر)

 

[شمشاد]

یہ اور بات کہ تعمیر ہو نہ سکیں
ورنہ ہر دل میں تاج محل ہوتے ہیں