دل کے موضوع پر اشعار!

[شمشاد]

آج اے دل لب و رخسار کی باتیں ہی سہی
وقت کٹ جائے گا کچھ پیار کی باتیں ہی سہی
(حمایت علی شاعر)

 

[عمر سیف]

بعض اوقات بہ مجبوریِ دل
ہم تو کیا آپ بھی روئے ہونگے

 

[شمشاد]

ہر گام آبلے سے ہے دل در تہِ قدم
کیا بیم اہلِ درد کو سختئیِ راہ کا
(غالب)

 

[عمر سیف]

زبانوں پر دلوں کی بات جب ہم لا نہیں سکتے
جفا پر بھی وفا کی داستاں کہنا ہی پڑتا ہے

 

[شمشاد]

بات اک آئی ہے دل میں نہ بتاؤں اس کو
عیب کیا ہے مگر اظہار ہی کر دینے میں
(ہری مچھندر بنی)

 

[سارہ خان]

آنکھ میں‌ بوند نہیں دل میں سمندر رکھنا
دولتِ درد کو سدا دل ہی کے اندر رکھنا

 

[تیلے شاہ]

دل دیا دلدار کو دلدار سمجھ کر
الو کے پٹھے نے پھینک دیا نسوار سمجھ کر۔

 

[شمشاد]

تو آپ سے کس نے کہا تھا کہ نسوار کی ڈبیہ میں رکھ کر دیں؟

 

[عمر سیف]

قناعت سیکھ لی ہے میرے دل نے
کمی مجھ کو نہیں لگتی کمی اب

 

[شمشاد]

دل لگا کر آپ بھی غالب مجھی سے ہوگئے
عشق سے آتے تھے مانع میرزا صاحب مجھے

 

[سارہ خان]

دِل دُکھتا ہے
آباد گھروں سے دور کہیں
جب بنجر بَن میں آگ جلے
دِل دُکھتا ہے
پردیس کی بوجھل راہوں میں
جب شام ڈھلے
دِل دُکھتا ہے
جب رات کا قاتل سناٹا
پُرہول فضا کے وہم لیے
قدموں کی چاپ کے ساتھ چلے
دِل دُکھتا ہے
جب وقت کا "نابینا جوگی"
کچھ ہنستے بستے چہرے پر
بے دَرد رُتوں کی خاک مَلے
دِل دُکھتا ہے

دِل دُکھتا ہے
جب شہ رگ میں محرومی کا
نشتر ٹوٹے
دِل دُکھتا ہے
جب ہاتھ سے ریشم رِشتوں کا
دامن چھوٹے
دِل دُکھتا ہے
جب تنہائی کے پہلو سے
انجانے درد کی لَے پُوٹے
دِل دُکھتا ہے

دِل دُکھتا ہے
زرداب رُتوں کے سائے میں
جب پھول کِھلیں
دِل دُکھتا ہے
جب زخم دہکنے والے ہوں
اور خوشبو کے پیغام ملیں
اور اپنے دریدہ دامن کے
جب چاک سلیں
دِل دُکھتا ہے

جب آنکھیں خود سے خواب بُنیں
خوابوں میں بسرے چہروں کی
جب بَھیڑ لگے
اس بھیڑ میں جب تم کھو جاؤ
دِل دُکھتا ہے
جب حبس بڑھے تنہائی کا
جب خواب جلیں، جب آنکھ بُجھے
تم یاد آؤ
دِل دُکھتا ہے!!

 

[شمشاد]

پھر ان کی گلی میں جائے گا، پھر سَہو کا سجدہ کر لے گا
اس دل پہ بھروسہ کون کرئے ہر روز مسلماں ہوتا ہے
(ابن انشاء)

 

[سارہ خان]

جو منزل بھی راہ میں آئی’ دل کا بوجھ بنی
وہ اس کی تعبیر نہ تھی جو خواب ہمارا تھا۔۔

 

[شمشاد]

درد ہے دل کا مکیں اس کو نکالے بھی تو کون؟
یہ بھی موتی کی طرح سیپ میں پلتا ہوگا
(فاخرہ بتول)

 

[عمر سیف]

دل میں اب یوں بھی تیرے بھولے ہوئے غم‌ آتے ہیں
جیسے بچھڑے ہوئے کعبے میں صنم آتے ہیں

 

[شمشاد]

پہلی دستک میں میرے دل میں اُترنے والے
دَر کھلے جس کیلئے اس کا ہی گھر ہوتا ہے
(فاخرہ بتول)

 

[عمر سیف]

کچھ اس لیے بھی مرا حرف حرف روشن ہے
ترے خیال نے دل کو اُجال رکھا ہے

 

[شمشاد]

غم رہا جب تک کہ دم میں دم رہا
دل کے جانے کا نہایت غم رہا
(میر)

 

[عمر سیف]

محبت میں جو دل ہوتے ہیں، وہ حساس ہوتے ہیں
جو دل میں میل آتا ہے، گماں کرنا سنبھل کے ہے

 

[نوید صادق]

دل کے معاملات میں کیا دوسروں کو دخل
تائیدِ ایزدی بھی گوارا نہیں ہمیں