دل کے موضوع پر اشعار!

[پاکستانی]

مانگے ہے مجھ سے دل تیری ساری نشانیاں
باتیں پرانیاں، وہی راتیں سہانیاں

آنکھوں میں گھولتی ہیں نشے کی شرارتیں
چالاک چاندنی میں چہکتی جوانیاں

اُن پر تو قرض ہیں میرے حرفوں کے ذائقے
اب جن کو آگئیں بڑی باتیں بنانیاں

اے عشق آ کہ پھر سے کوئی تجربہ کریں
میں بھولنے لگا ہوں پرانی کہانیاں

وہ تیرے قہقہے تھے کہ جیسے ہجوم میں
ٹوٹیں کلائیوں میں کھنکتی کمانیاں

یہ میرے اشک ہیں کہ پہاڑوں میں جس طرح
روئیں بسنت رُت میں ندی کی روانیاں

اِک تیرے روٹھنے سے فضا ہی بدل گئی
اب شہر بھر میں پھیل گئیں بدگمانیاں

مانگو دعا کہ کھیلتی کِھلتی رہیں سدا
شہروں کی دلہنیں، مری بستی کی رانیاں

محسن کو کچھ تو حدِّ ستم کا سُراغ دے
کب تک رقم کروں میں تیری مہربانیاں

 

[عمر سیف]

نگارِ یار کا کیا ہے، ہوئی، ہوئی نہ ہوئی
یہ دل کا درد ہے پیارے، گیا، گیا نہ گیا

 

[پاکستانی]

کل شب چکنا چور ہوا تھا دل اس کا
یا پھر پہلی بار وہ دل کھول کر روئی تھی

 

[عمر سیف]

بہت شور سنتے تھے پہلو میں دل کا
جو چیرا تو اک قطرہء خوں نہ نکلا

 

[پاکستانی]

سنو اچھا نہیں لگتا
کرے جب تذکرہ کوئی
کرے جب تبصرہ کوئی
تمھاری ذات کو کھوجے
تمھاری بات کو سوچے
مجھے اچھا نہیں لگتا
سنو اچھا نہیں لگتا
تمھاری مسکراہٹ پر
ہزاروں لوگ مرتے ہوں
تمھاری ایک آہٹ پر
ہزاروں دل دھڑکتے ہوں
کسی کا تم پہ یوں مرنا
مجھے اچھا نہیں لگتا
سنو اچھا نہیں لگتا
ہوا گزرے تمھیں چھو کر
نہ ہوگا ضبط یہ مجھ سے
کرے کوئی تم سے گستاخی
تیری زلفیں بکھر جائیں
تمھارا لمس پی جائیں
مجھے اچھا نہیں لگتا
سنو اچھا نہیں لگتا
کہ تم کو پھول بھی دیکھیں
تمھارے پاس سے مہکیں
یا چندا کی گزارش ہو
کہ اپنی روشنی بخشو
رُخِ جاناں کوئی دیکھے

مجھے اچھا نہیں لگتا۔۔۔​

 

[عمر سیف]

دنيا نے تيري ياد سے بيگانہ کرديا
تجھ سے بھي دلفريب ہيں غم روزگار کے
بھولے سے مسکرا تو ديے تھے وہ آج فيض
مت پوچھ ولولے دل کا ناکردہ کار کے

 

[پاکستانی]

ذرا سا تو دل ہوں مگر شوخ اتنا
وہی لن ترانی سنا چاہتا ہوں

 

[عمر سیف]

رات یوں دل میں تیری کھوئی ہوئی یاد آئی
جیسے ویرانے میں چپکے سے بہار آ جائے
جیسے صحراؤں میں ہولے سے چلے باد نسیم
جیسے بیمار کو بے وجہ قرار آ جائے

 

[پاکستانی]

میرے دل میں کئ گھاؤ ایسے بھی ہیں
جن کا درماں تیری دسترس میں نہیں

 

[عمر سیف]

آپ کو آخر یہ حق کس نے دیا
آپ اہلِ دل کو کیوں رسوا کریں
آپ نے تو پھر بہایا خونِ خلق
ہم اگر غصّے میں آئیں کیا کریں

 

[پاکستانی]

زندگی بھر کی وفاؤں کا صلہ ہے یاروں
دلِ برباد کے زخموں کی دوا کیسے کروں

 

[عمر سیف]

اے دل وہ عاشقي کے فسانے کدہر گئے؟
وھ عمر کيا ہوئي ، وہ زمانے کدہر گئے؟
ويراں ہيں صحن و باغ، بہاروں کو کيا ہوا
وہ بلبليں کہاں وہ ترانے کدہر گئے؟

 

[نوید ملک]

دل تو میرا اداس ہے ناصر
شہر کیوں سائیں سائیں کرتا ہے

 

[عمر سیف]

ہم سمندر کی طرح ظرف وسیع رکھتے ہیں
دل میں طوفاں چہرے پر تسکیں رکھتے ہیں

 

[حجاب]

یہ دل بہت اداس ہے جب سے خبر ہوئی
ملتے ہیں وہ خلوص سے ہر آدمی کے ساتھ

 

[عمر سیف]

دل نے ذرا سے غم کو قیامت بنا دیا
ورنہ وہ آنکھ اتنی زیادہ خفا نہ تھی

 

[نوید ملک]

وہ شخص اس قدر کبھی مجھ سے خفا نہ تھا
يہ دل بھی اس قدر تو پريشاں رہا نہ تھا

 

[عمر سیف]

تم نے تو کہہ ڈالا سب حالِ دِل اپنا
اب مجھ کو اپنی داستاں بھی کہنے دو

 

[تیشہ]

ہر سمت ہوا تیز، فضا تابہ اُفق تنگ
دل ذرہء صحرا ہے، بگولوں میں گھرا ہے

کیوں جاگے ہوئے شہر میں تنہا ہے ہر اک شخص
یہ روشنی کیسی ہے کہ سایہ بھی جداُ ہے ۔

 

[عمر سیف]

ملا نہ کرو ہم سے روز آ کر
تمہارے دل کو عادت ہوگئی تو