زیرک کے پسندیدہ اشعار

[زیرک]

مُڑے مُڑے سے ہیں کتابِ حیات کے صفحات
یہ کون ہے جو مجھے میرے بعد پڑھتا ہے؟​

 

[زیرک]

لہجے کو ذرا دیکھ جواں ہے کہ نہیں ہے
بالوں کی سفیدی کو بڑھاپا نہیں کہتے​

 

[زیرک]

ہاتھ پر ہاتھ رکھا اس نے تو معلوم ہوا
اَن کہی بات کو کس طرح سنا جاتا ہے​

 

[زیرک]

یہ تیرا شہر بھی ہے شہرِ زلیخا جاناں
وہ پیمبر ہے جو دامن کو بچا لے جائے​

 

[زیرک]

یہ ہے جنون کا دفتر، قطار میں لگ جائیں
یہاں نہ ہو گا سفارش سے اور دام سے کام
عمیر نجمی​

 

[زیرک]

دباؤ میں بھی جماعت کبھی نہیں بدلی
شروع دن سے محبت کے ساتھ ہیں ہم لوگ
عمیر نجمی​

 

[زیرک]

تمام رشتے ہیں اک طرف، دوسری طرف ماں
یہ ایک تصویر، سارے البم سے مختلف ہے
عمیر نجمی​

 

[زیرک]

میں خود کو تجھ سے مٹاؤں گا احتیاط کے ساتھ
تُو بس نشان لگا دے جہاں جہاں ہوں میں
عمیر نجمی​

 

[زیرک]

دھکیلا ہے اسے واپس کنویں میں
مسلسل ٹرٹرائے جا رہا تھا
منیر انور​

 

[زیرک]

اصل میں ہیں حلیف راون کے
منہ پہ جو رام رام کرتے ہیں
منیر انور​

 

[زیرک]

وقت وہ ہے کہ اٹھ کے سب گھوڑے
اِک گدھے کو سلام کرتے ہیں
منیر انور​

 

[زیرک]

تم بہت دور ہو، ہم بھی کوئی نزدیک نہیں
دل کا کیا ٹھیک ہے کم بخت ٹھہر جائے کہاں​

 

[زیرک]

زندگی!! جس کو ترا پیار ملا، وہ جانے
ہم تو ناکام رہے چاہنے والوں کی طرح​

 

[زیرک]

اک ہاتھ میں تلوار تھی اک ہاتھ میں کشکول
ظالم تو وہ تھا ہی، مِرا سائل بھی وہی تھا​

 

[زیرک]

فائدہ ایک ہو سب کا، یہ تو ہو سکتا ہے
ایک جیسا ہو خسارہ، یہ ضروری تو نہیں​

 

[زیرک]

حضرتِ شیخ جو پکڑے گئے مئے خانے میں
وردِ لاحول تھا، تسبیح کے ہر اک دانے میں​

 

[زیرک]

ڈوبا ہوا ہوں زہر میں، پر پی نہیں رہا
میں سہہ رہا ہوں زندگی، جی نہیں رہا​

 

[جاسمن]

مُڑے مُڑے سے ہیں کتابِ حیات کے صفحات
یہ کون ہے جو مجھے میرے بعد پڑھتا ہے؟​

بہت خوب!
واہ!
یہ کون ہے جو مجھے میرے بعد پڑھتا ہے

 

[زیرک]

داد بنتی ہے، بڑا کام کیا ہے ہم نے
دستبردار ہوئے، مڑ کے نہ دیکھا اس کو
فاخرہ بتول​

 

[زیرک]

یہ بار کہیں خود ہی اٹھانا نہ پڑے کل
اوروں کو بچھڑنے کی دعائیں نہیں دیتے
فاخرہ بتول​