شعر و شاعر (اشعار اور خالق)

[طارق شاہ]

گردشِ گردوں کے آگے کِس کا زور
کون دَم مارے خُدا کے کام ہیں

اکبر الٰہ آبادی

 

[طارق شاہ]

یہ ٹھیک نصیحت ہے کہ، ہے ہم پہ عمل فرض!
یہ وعظ غلط ہے کہ توکّل نہیں اچھّا

اکبر الٰہ آبادی

 

[طارق شاہ]

جہانِ فانی کی انجمن میں یہی تسلسل ہمیشہ دیکھا !
اُمید کے ساتھ شاد آنا، اُٹھا کے صدمے ملول جانا

اکبر الٰہ آبادی

 

[طارق شاہ]

گُریز کی رہی کوشش بھی کامیاب نہیں!
دِل اب بھی خاک میں ہم کو مِلانے جاتا ہے

شفیق خلؔش

 

[طارق شاہ]

آہن میں ڈھلتی جائے گی اِکیسویں صدی
پِھر بھی غزل سُنائے گی اِکیسویں صدی

بغداد، دِلّی، ماسکو، لندن کے درمیاں
بارُود بھی بِچھائے گی اِکیسویں صدی

بشیر بدؔر

 

[طارق شاہ]

شجر کو سبز قبا دیکھ کر یہ اُلجھن ہے
کہاں پہ رنگ نمو ہے، کہاں پہ زہر کا رنگ

پروین شاکر

 

[طارق شاہ]

خوشبُو بھی اُس کی طرز ِپزیرائی پرگئی
دِھیرے سے میرے ہاتھ کو چُھوکر گُزرگئی

پروین شاکر

 

[طارق شاہ]

سُپردگی کا نشہ ٹُوٹنے نہیں پاتا
انَا سما ئی ہُوئی ہے وفا کی بانہوں میں

پروین شاکر

 

[عبد الرحمٰن]

یہ بستی ہے مسلمانوں کی بستی
یہاں کارِ مسیحا کیوں کریں ہم
جون ایلیاء

 

[طارق شاہ]

جو سائے دُور چراغوں کے گِرد لرزاں ہیں
نہ جانے محفِلِ غم ہے کہ بزمِ جام و سبُو

جو رنگ ہر دَر و دِیوار پر پریشاں ہیں
یہاں سے کُچھ نہیں کُھلتا یہ پُھول ہیں کہ لہُو

فیض احمد فیضؔ

 

[طارق شاہ]

راہیں نکالتا ہے یہی سوز و ساز کی !
پہلوُ میں دِل نہ ہو ،تو کوئی حوصلہ نہ ہو

عبدلحلیم شرؔر

 

[طارق شاہ]

سیرِ باغ و بوستاں، تو ہے میسّر ہر گھڑی
آئیے، گاہے فقیروں کے بھی ویرانے کے بیچ

خواجہ مِیر درؔد دہلوی

 

[طارق شاہ]

جو مزے ہیں مرگ میں ، سو ہم سے پُوچھا چاہیے
کون جانے آہ ! کیا لذّت ہے مرجانے کے بیچ

خواجہ مِیر درؔد دہلوی

 

[طارق شاہ]

فیضؔ دِلوں کے بھاگ میں ہے ، گھر بھرنا بھی لُٹ جانا بھی
تم اِ س حُسن کے لُطف و کَرَم پر کتنے دِن اِتراؤ گے

فیض احمد فیضؔ

 

[طارق شاہ]

مُمکن ہے اِلتجا میں ہماری اثر نہ ہو !
ایسا نہیں کہ اُس کو ہماری خبر نہ ہو

شفیق خلشؔ

 

[مریم افتخار]

آپ کا انتخاب بہت اچھا ہے اور خاص طور پر جس مستقل مزاجی سے پوسٹنگ کرتے ہیں اُس پر داد نہ دینا یقیناََ نا انصافی ہے۔
آگے بڑھتے رہئیے!
ہنستے بستے رہئیے!!

 

[طارق شاہ]

تِیرَگی جال ہے، اور بھالا ہے نُور
اِک شکارِی ہے دِن، اِک شکاری ہے رات
جگ سمندر ہے، جِس میں کنارے سے دُور!
مچھلیوں کی طرح ابنِ آدم کی ذات
جگ سمندر ہے، ساحِل پہ ہیں ماہی گیر
جال تھامے کوئی، کوئی بھالا لئے
میری باری کب آئے گی کیا جانئے
دِن کے بھالے سے مجھ کو کریں گے شِکار
رات کے جال میں یا کریں گے اسیر ؟

فیض احمد فیضؔ

 

[طارق شاہ]

آنسو نِکل نہ پائے نہ کُچھ منہ سے کہہ سکے !
وہ کیا گیا ، کہ شاؔذ کلیجہ نِکل گیا

شاؔذ تمکنت

 

[طارق شاہ]

تھی اور ہی کُچھ بات ،کہ تھا غم بھی گوارا
حالات ہیں اب درپئے جاں اور طرح کے

ناصؔر کاظمی

 

[طارق شاہ]

دُنیا کو نہیں تاب مِرے درد کی یارب !
دے مجھ کو اسالیبِ فُغاں اور طرح کے

ناصؔر کاظمی