منتخب اشعار برائے بیت بازی!

[زیک]

یونہی موسم کی ادا دیکھ کے یاد آیا ہے
کس قدر جلد بدل جاتے ہیں انساں جاناں

 

[شمشاد]

نہ تھا کچھ تو خدا تھا، کچھ نہ ہوتا تو خدا ہوتا
ڈبویا مجھ کو ہونے نے، نہ ہوتا میں تو کیا ہوتا
(میرزا غالب)

 

[زیک]

اے ہم‌نفسو کچھ تو کہو عہدِ ستم کی
اک حرف سے ممکن ہے حکایت نکل آئے

 

[شمشاد]

یہی حالات ابتدا سے رہے
لوگ ہم سے خفا خفا سے رہے
(جاوید اختر)

 

[عبدالرحمان]

یہ عالم شوق کا دیکھا نہ جائے
وہ بت ہے یا خدادیکھا نہ جائے


میں معذرت خواہ ہوں کے جب میں نے شعر پوسٹ کیا تو مقا بلہ الف سے آگے بڑہ چکا تھا اب میں تصیح کر رہا ہوں

 

[زیک]

عبدالرحمان: یہ بیت‌بازی ہو رہی ہے۔ آپ کو شعر “ی“ سے لکھنا تھا نہ کہ الف سے۔

یہ بھی وقت آنا تھا، اب تو گوش برآواز ہے
اور میرے بربطِ دل میں صدا کوئی نہیں

 

[رضوان]

اک فرصت گناہ ملی، وہ بھي چار دن
ديکھے ہيں ہم نے حوصلے پروردگار کے
(فیض)

 

[رضوان]

ن سے حاضر ہے

ناحق ہم مجبوروں پر يہ تہمت ہے مختاري کي
چاہتے ہيں سو آپ کريں ہيں ہم کو عبث بد نام کيا
میر تقی میر

 

[سیدہ شگفتہ]

اُس کا آنا ناممکن تھا
میرا جانا ناممکن تھا
ایک تضاد تھا دونوں جانب
شہر بسانا ناممکن تھا​

(سعداللہ شاہ)

 

[عبدالرحمان]

ابن مریم ہوا کرے کوئی
میرے درد کی دوا کرے کوئی

 

[زیک]

یہ جو نشے ہیں سفر کے نہ اتر جائیں کہیں
کوئی منزل نہ سہی سامنے پر جائیں کہیں

 

[سیدہ شگفتہ]

نسیمِ مصر کو کیا پیرِ کنعاں کی ہَوا خواہی
اُسے یُوسف کی بُوئے پَیرہن کی آزمائش ہے


​

(غالب)

 

[شمشاد]

نظم الجھی ہوئی ہے سینے میں
مصرعے اٹکے ہوئے ہیں ہونٹوں پر
اڑتے پھرتے ہیں تتلیوں کی طرح
لفظ کاغذ پے بیٹھتے ہی نہیں
(گلزار)

 

[سیدہ شگفتہ]

شمشاد بھائی

ن سے نہیں ی سے

 

[شمشاد]

ایک تو شعر پوسٹ کرتے کرتے ایک اور شعر آ جاتا ہے، خیر اب ‘ے‘ سے بھی لکھ دیتا ہوں

یہی بہت ہے کہ دل اس کو ڈھونڈ لایا ہے
کسی کے ساتھ سہی وہ نظر تو آیا ہے
(امجد اسلام امجد)

 

[عبدالرحمان]

یہ مسائل تصوف، یہ تیرا بیان غالب
تجھے ہم ولی سمجھتے ،جونہ بادہ خوار ہوتا

 

[شمشاد]

اس توبہ پر ناز مجھے زاہد اس قدر
جو ٹوٹ کر شریک ہوں حالِ تباہ میں
(داغ دہلوی)

 

[الف عین]

نہیں معلوم ، کس کس کا لہو پانی ہوا ہوگا
قیامت ہے سرشک آلودہ ہونا تیری مژگاں کا
غالب اور کون؟

 

[شمشاد]

آج جانے کی ضد نہ کرو
یوں ہی پہلو میں بیٹھے رہو
ہائے مر جائیں گے، ہم تو لُٹ جائیں گے
ایسی باتیں کیا نہ کرو
(فیاض ہاشمی)

 

[الف عین]

اگر پہلے ہو بھی گیا ہوے تو دوبارہ سن لو:
وہ آئیں گھر میں ہمارے خدا کی قدرت ہے
کبھی ہم ان کو کبھی اپنے گھر کو دیکھتے ہیں۔