میرے پسندیدہ اشعار

[گُلِ یاسمیں]

عشق تھا اپنی جگہ اٹل سمجھوتہ اپنی جا
ایک سے دل آباد رہا اور ایک سے گھر آباد

زبردست۔۔۔۔

 

[گُلِ یاسمیں]

کون آئے گا یہاں کوئی نہ آیا ہوگا
میرا دروازہ ہواؤں نے ہلایا ہوگا

کیف بھوپالی

 

[گُلِ یاسمیں]

اسی خیال میں ہر شام انتظار کٹی
وہ آ رہے ہیں وہ آئے وہ آئے جاتے ہیں

نظر حیدرآبادی

 

[سیما علی]

محبت ایک طرح کی نری سماجت ہے
میں چھوڑوں ہوں تری اب جستجو ہوا سو ہوا

 

[سیما علی]

الٰہی کیا علاقہ ہے وہ جب لیتا ہے انگڑائی
مرے سینے میں سب زخموں کے ٹانکے ٹوٹ جاتے ہی

 

[سیما علی]

گل کے ہونے کی توقع پہ جیے بیٹھی ہے
ہر کلی جان کو مٹھی میں لیے بیٹھی ہے

 

[سیما علی]

ملنے کو تجھ سے دل تو مرا بے قرار ہے
تو آ کے مل نہ مل یہ ترا اختیار ہے

جس جس کے پاس دوستو جس جس کا یار ہے
بہتر چمن سے گھر میں اسی کے بہار ہے

تم زخم دل کی میرے خبر پوچھتے ہو کیا
تیر نگاہ دل کے تو اب وار پار ہے

گر دشمنی پہ دوست نے باندھی مرے کمر
دشمن ہے اب جو کوئی مرا دوست دار ہے

لگتی نہیں پلک سے مری اب ذرا پلک
آنے کا اس کے جب سے مجھے انتظار ہے

اے شہسوار اس کو بھی کر لے تو اب شکار
یہ صید دل بھی عمر سے امیدوار ہے

یہ کچھ تو حال تیرے دیوانے کا اب ہوا
جیدھر کو جاوے آہ اسے مار مار ہے

اے گل تجھے عزیز ہوں رکھتا میں اس لیے
یعنی کہ تجھ میں ایک رمق بوئے یار ہے

یہ کس کے دل کو چھین کے کرتے ہیں پائمال
ان ظالموں کا آہ یہی کاروبار ہے

آصفؔ خدا کے واسطے مت دے بتوں کو دل
یہ وہ ہیں جن کے قول کا کیا اعتبار ہے

آصف الدولہ

 

[سیما علی]

ابھی ہے غیر کے الطاف سے جفائے حبیب
وہی رضا ہے ہماری جو ہے رضائے حبیب

نہ سمجھوں اپنا کسی کو رقیب رشک سے میں
وہ میرا دوست ہے جو ہووے آشنائے حبیب

وہ خواہ قتل کرے خواہ میری جاں بخشے
کہ مرگ و زیست پہ مختار ہے رضائے حبیب

نہ تیغ یار سے گردن پھراؤں میں ہرگز
کہ عین لطف سمجھتا ہوں میں جفائے حبیب

پتنگے شمع کے صدقے ہوں بلبلیں گل پر
کوئی کسی کے فدا ہو میں ہوں فدائے حبیب

بہشت کی مجھے ترغیب دے نہ تو واعظ
کسی کی مجھ کو تمنا نہیں سوائے حبیب

ہمیشہ مجھ سے وہ کہتا تھا مر کہیں حسرتؔ
ہزار شکر پذیرائی ہوئی دعائے حبیب

جعفر علی حسرت

 

[سیما علی]

نے گل کو ہے ثبات نہ ہم کو ہے اعتبار
کس بات پر چمن ہوس رنگ و بو کریں

ہے اپنی یہ صلاح کہ سب زاہدان شہر
اے دردؔ آ کے بیعت دست سبو کریں

 

[سیما علی]

کُھلا ہے جُھوٹ کا بازار، آؤ سچ بولیں
نہ ہو بلا سے خریدار، آؤ سچ بولیں
سکُوت چھایا ہے انسانیت کی قدروں پر
یہی ہے موقعِ اِظہار، آؤ سچ بولیں
جو وصف ہم میں نہیں کیوں کریں کسی میں تلاش
اگر ضمیر ہے بیدار، آؤ سچ بولیں
چُھپائے سے کہیں چُھپتے ہیں داغ چہروں کے
نظر ہے آئینۂ بردار، آؤ سچ بولیں

 

[شمشاد]

چمکا ہے یوں نصیب کا تارا کبھی کبھی
ہم کو تو خود اسی نے پکارا کبھی کبھی

لے ڈوبتا ہے دل کو سہارا کبھی کبھی
منجدھار بن گیا ہے کنارا کبھی کبھی

یہ بھی ہوا ہے حال ہمارا کبھی کبھی
اپنے کو ہم نے آپ پکارا کبھی کبھی

اپنے سے بے نیاز ہوا جا رہا ہوں میں
سن سن کے تم سے حال تمہارا کبھی کبھی

ساتھ اپنے شام ہجر کے جاگوں کہ آس بھی
لے ڈوبتا ہے صبح کا تارا کبھی کبھی

طوفاں سے بچنے والے بہت شادماں نہ ہو
کشتی پہ پھٹ پڑا ہے کنارا کبھی کبھی

منظرؔ شکایتوں کی تلافی ضرور ہے
اک سجدہ شکر کا بھی خدارا کبھی کبھی
(منظر لکھنوی)

 

[شمشاد]

آنکھوں میں رہا دل میں اتر کر نہیں دیکھا
کشتی کے مسافر نے سمندر نہیں دیکھا

بے وقت اگر جاؤں گا سب چونک پڑیں گے
اک عمر ہوئی دن میں کبھی گھر نہیں دیکھا
(بشیر بدر)

 

[گُلِ یاسمیں]

تری خوشبو نہیں ملتی، ترا لہجہ نہیں ملتا
ہمیں تو شہر میں کوئی ترے جیسا نہیں ملتا

 

[شمشاد]

حیا سے سر جھکا لینا ادا سے مسکرا دینا
حسینوں کو بھی کتنا سہل ہے بجلی گرا دینا
اکبر الہ آبادی

 

[شمشاد]

تمہاری یاد کے جب زخم بھرنے لگتے ہیں
کسی بہانے تمہیں یاد کرنے لگتے ہیں
(فیض احمد فیض)

 

[شمشاد]

اک طرز تغافل ہے سو وہ ان کو مبارک
اک عرض تمنا ہے سو ہم کرتے رہیں گے
(فیض احمد فیض)

 

[گُلِ یاسمیں]

زخم تمہارے بھر جائیں گے تھوڑی دیر لگے گی
بے صبری سے کام لیا تو اور بھی دیر لگے گی

 

[شمشاد]

بچھڑ رہا تھا مگر مڑ کے دیکھتا بھی رہا
میں مسکراتی رہی میں نے بھی کمال کیا
فاطمہ حسن

 

[گُلِ یاسمیں]

رنجش ہی سہی دل ہی دکھانے کے لئے آ
آ پھر سے مجھے چھوڑ کے جانے کے لئے آ

احمد فراز

 

[گُلِ یاسمیں]

اک عمر سے ہوں لذت گریہ سے بھی محروم
اے راحت جاں مجھ کو رلانے کے لئے آ

احمد فراز