میرے پسندیدہ اشعار

[سیما علی]

جن کوسورج میری چوکھٹ سے ملا کرتا تھا۔
اب وہ خیرات میں دیتے ہیں اجالے مجھکو۔
افتخار عارف

 

[سیما علی]

آواز دے كے چُھپ گئی ہر بار زندگی
ہَم ایسا سادہ دِل تھے كے ہر بار آ گئے

 

[یاسر شاہ]

نہ وہ ادائے تکلم نہ احتیاطِ زباں
مگر یہ ضد کہ ہمیں اہلِ لکھنو کہیے
جالب

سیما جی آپ کے لیے بدل دیا اسے:

وہی ادائے تکلم وہی احتیاط زباں
ہم آج کیوں نہ تمھیں اہل لکھنؤ کہتے

 

[یاسر شاہ]

بڑے بنے تھے جالبؔ صاحب پِٹے سڑک کے بیچ
گولی کھائی لاٹھی کھائی گرے سڑک کے بیچ

 

[سیما علی]

سیما جی آپ کے لیے بدل دیا اسے:

جیتے رہیے شاد و آباد رہیے ۔آمین
پروردگار قدم قدم پر آسانیاں عطا فرمائے۔🥰

 

[سیما علی]

نامہ بر تو ہی بتا تو نے تو دیکھے ہوں گے
کیسے ہوتے ہیں وہ خط جن کے جواب آتے ہیں
قمر بدایونی

 

[سیما علی]

بسکہ ہوں دل تنگ خوش آتا ہے صحرائے قفس
بلبل بے بال و پر رکھتی ہے سودائے قفس

پالنا منظور ہے تو دست پرور کر اسے
طائر وحشی مبادا دیکھ مر جائے قفس

دیکھ کے صیاد کو محو تماشا ہو گئی
بلبل تصویر سے مت پوچھ ایذائے قفس

ہم دعا ہو ہم صفیرو تا اجابت ہو قریں
رحم کھا کر باغ میں صیاد پھر لائے قفس

ہم صفیر اس باغ کے سب قید تیرے ہو چکے
عشق مجھ کو بھی دکھا دے تو تماشائے قفس

گل کی خاطر قید میں رہتی ہے ورنہ باغباں
نالۂ جاں سوز سے بلبل کے جل جائے قفس

تیلیاں گنتے ہی گنتے عمر کے دم ہو چکے
تخت سے اڑ کر نہ پہنچے عشق بالائے قفس
خواجہ رکنُ الدین عشق

 

[شمشاد]

اس راز کو کیا جانیں ساحل کے تماشائی
ہم ڈوب کے سمجھے ہیں دریا تری گہرائی

جاگ اے مرے ہمسایہ خوابوں کے تسلسل سے
دیوار سے آنگن میں اب دھوپ اتر آئی

چلتے ہوئے بادل کے سائے کے تعاقب میں
یہ تشنہ لبی مجھ کو صحراؤں میں لے آئی

یہ جبر بھی دیکھا ہے تاریخ کی نظروں نے
لمحوں نے خطا کی تھی صدیوں نے سزا پائی

کیا سانحہ یاد آیا رزمیؔ کی تباہی کا
کیوں آپ کی نازک سی آنکھوں میں نمی آئی
مظفر رزمی

 

[شمشاد]

عشق اور عقل میں ہوئی ہے شرط
جیت اور ہار کا تماشا ہے
سراج اورنگ آبادی

 

[سیما علی]

غم جہاں سے جسے ہو فراغ کی خواہش
‏وہ ان کے درد محبت سے ساز باز کرے

‏امیدوار ہیں ہر سمت عاشقوں کے گروہ
‏تری نگاہ کو اللہ دل نواز کرے

‏ترے کرم کا سزاوار تو نہیں حسرتؔ
‏اب آگے تیری خوشی ہے جو سرفراز کرے۔

‏حسرتؔ موہانی

 

[شمشاد]

پڑھ لے گا کوئی رات کی روئی ہوئی آنکھیں
ہر سمت ہیں آرام سے سوئی ہوئی آنکھیں

جن لوگوں کی منزل پہ نظر ہوتی ہے ہر دم
ان کا ہی تماشا ہیں یہ کھوئی ہوئی آنکھیں

دن بھر تو جمے رہتے ہیں پلکوں پہ وہی خواب
کیوں ہوش میں لاتی نہیں دھوئی ہوئی آنکھیں

آنکھوں کا جمال آپ کو معلوم ہی کیا ہے
دیکھیں ہیں کبھی رات وہ سوئی ہوئی آنکھیں

دل ہے کہ تجھے پائیں بکھر جائیں اے مولا
بینائی کے دھاگے میں پروئی ہوئی آنکھیں

کچھ بھی نہ دکھا معجزہ تھا ہی یہی عامرؔ
کھولی گئیں زمزم سے بھگوئی ہوئی آنکھیں
(عامر خان)

 

[سیما علی]

وفا پر دغا صلح میں دشمنی ہے
بھلائی کا ہرگز زمانہ نہیں ہے

 

[شمشاد]

میں اور اس غنچہ دہن کی آرزو
آرزو کی سادگی تھی میں نہ تھا
عبد الحمید عدم

 

[سیما علی]

مقصود مزہ ہے تو امیرؔ اور کہو شعر
ہوں گے انہیں پھولوں انہیں پتوں میں ثمر بھی
امیر مینائی

 

[شمشاد]

آواز دے کے دیکھ لو شاید وہ مل ہی جائے
ورنہ یہ عمر بھر کا سفر رائیگاں تو ہے
منیر نیازی

 

[سیما علی]

آج دل کی وہ چھب ، وہ دھج نہ سہی
ہجر میں داغ دار سا ، کچھ ہے

 

[یاسر شاہ]

دل وہ دل_نازک ہے دل آزاری نہ کیجو
حرکت تو کجا بات بھی بازاری نہ کیجو

بس جز نظر_بد ،حسد اور کچھ نہیں حاصل
با تنگ دل و تنگ نظر یاری نہ کیجو

یاسر

 

[سیما علی]

بس جز نظر_بد ،حسد اور کچھ نہیں حاصل
با تنگ دل و تنگ نظر یاری نہ کیجو

بے حد کمال
جیتے رہیے 🥰🥰🥰🥰

 

[سیما علی]

بیکلی اُس کی نہ ظاہر تھی جو تو اے بلبل
دم کش میر ہوئی اُس لبِ گفتار کے ساتھ
(میر تقی میر)

 

[سیما علی]

ظاہر میں تو کچھ اپنی خطائیں بھی نہیں نہیں
دل پھر بھی پشیمان ہے معلوم نہیں کیوں
(فاطمہ ‌تبسم)