"یاد" کے موضوع پر اشعار!

[راجہ صاحب]

یادوں کے سبز لان میں پھولوں کے اس طرف
اب بھی ہے آبشار کا منظر بنا ہوا

منصور آفاق

 

[فرقان احمد]

یادوں کی بوچھاڑوں سے جب پلکیں بھیگنے لگتی ہیں
سُوندھی سُوندھی لگتی ہے تب ماضی کی رُسوائی بھی!

(گلزار)

 

[مریم افتخار]

کب یاد میں تیرا ساتھ نہیں، کب ہاتھ میں تیرا ہاتھ نہیں
صد شُکر کہ اپنی راتوں میں اب ہجر کی کوئی رات نہیں

 

[محمد تابش صدیقی]

ان کا خیال جملہ مشاغل کے ساتھ ساتھ
رہتی ہے ان کی یاد مرے دل کے ساتھ ساتھ

نظرؔ لکھنوی

 

[محمد تابش صدیقی]

کافری شیوہ مرا، فطرت مسلمانی مری
یاد ان کی سو بتوں کے درمیاں رکھتا ہوں میں

نظرؔ لکھنوی

 

[محمد تابش صدیقی]

آنکھوں میں اشک، آہ لبوں پر، جگر میں سوز
آئی ہے ان کی یاد بڑے اہتمام سے

نظرؔ لکھنوی

 

[زیرک]

اسے کہو کہ کوئی یاد ہی روانہ کرے
‏کہ اب تو لگ چکی عمرِ خضر اداسی کو
‏نثار محمود تاثیر

 

[زیرک]

احباب نے، رقِیب نے، دل نے، رفِیق نے
یہ بھی رہا نہ یاد کہ کس کس نے مات دی

 

[زیرک]

خود کو دیتے بھی رہے ترکِ تعلق کا فریب
اور درپردہ کسی کو یاد بھی کرتے رہے
اقبال عظیم

 

[زیرک]

بیٹھا ہے کیوں اداس وہ دلبر کی یاد میں
مجھ سے تو کہہ ریا تھا محبت فضول ہے

 

[زیرک]

تیری یادیں بھی بہت لاڈلی ہیں
ساتھ سوتی ہیں، ساتھ اٹھتی ہیں​

 

[زیرک]

اداسی، شام، تنہائی، کسک، یادوں کی بے چینی
مجھے سب سونپ کر سورج اتر جاتا ہے پانی میں

 

[سحرش سحر]

سارہ خان میں نے یہ شعر کچھ یوں سنا تھا ۔
""اپنی یادوں کے چراغ میرےساتھ رہنے دے
نجانے کس گلی میں زندگی کی شام ہو جائے"""

 

[عبدالرحمن آزاد]

حسن دیکھا جو بتوں کا تو خدا یاد آیا
راہ کعبہ کی ملی ہے مجھے بت خانے سے

 

[زیرک]

عین ممکن تھا میں تجھ سے محبت کرتا
دیکھ کر تجھ کو اگر یاد نہ آتا کوئی

 

[زیرک]

دعائیں یاد کرا دی گئی تھیں بچپن میں
سو زخم کھاتے رہے اور دعا دئیے گئے ہم

 

[زیرک]

یادیں اور خزاں

ہوا جب زرد پتوں کو شاخوں سے گراتی ہے
مجهے تم سے بچهڑنے کا زمانہ یاد آتا ہے​

 

[زیرک]

پلکوں نے اتنی ایڑیاں رگڑیں شب فراق
زم زم تمہاری یاد کا جاری ہے آج تک​

 

[زیرک]

آج جمیل الدین عالی جی کا یومِ وفات ہے، مرحوم کے ایصالِ ثواب کیلئے دعا کیجئے گا۔

کچھ نہ تھا یاد بجز کار محبت اک عمر
وہ جو بگڑا ہے تو اب کام کئی یاد آئے​

 

[زیرک]

آج جمیل الدین عالی جی کا یومِ وفات ہے، مرحوم کے ایصالِ ثواب کیلئے دعا کیجئے گا۔

اک شرط ہے یاں خوشبوئے وفا یاد آئے تو کرنا یاد ذرا
جب تم پہ بھروسا تھا گل کا کیا مہکے کیا مہکائے گئے​