آج کا شعر - 4

[مغزل]

خدا آباد رکھے میکدہ یہ تو سمجھ ساقی
ہزاروں بادہ کش ہیں ایک پیمانے سے کیا ہوگا

استاد قمر جلالوی

 

[راجہ صاحب]

رسوائیوں کا آپ کو اب آیا ہے خیال
ہم نے اپنے دوست بھی دشمن بنا لئے


نامعلوم

 

[محمداحمد]

آنکھ کچھ موتی اُگل کر رہ گئی
غم کی چنگاری پگھل کر رہ گئی

کیا کیا اے بلبلِ آتش نفس
آشیاں میں برق جل کر رہ گئی

زندگی کی دوسری کروٹ تھی موت
زندگی کروٹ بدل کر رہ گئی

وحشت کلکتوی

 

[مغزل]

کیا جانے کہے گا کیا آکر ، ہے دَور یہاں پیمانے کا
اللہ کرے واعظ کو کبھی رستہ نہ ملے میخانے کا

ہیں تنگ ترےمیکش ساقی یہ پڑھ کے نماز آتا ہے یہیں
یا شیخ کی توبہ تڑوا دے ، یا وقت بدل میخانے کا

استاد قمر جلالوی

 

[کاشفی]

حصارِ ذات سے نکلوں تو تجھ سے بات کروں
تری صفات کو سمجھوں تو تجھ سے بات کروں

تو کوہسار میں، وادی میں، دشت و صحرا میں
میں تجھ کو ڈھونڈ نکالوں تو تجھ سے بات کروں
(راج کمار قیس)

 

[مغزل]

میں عمر کے رستے ہیں چپ چاپ بکھر جاتا
اک پل بھی اگر اپنی تنہائی سے ڈر جاتا
عزم بہزاد

 

[راجہ صاحب]

نفرت کی آگ کتنے گھروں کو جلا گئی
اک بھیڑ سی لگی ہے کفن کی دکان پر

 

[مغزل]

ہونٹ پتھرا سے گئے، آنکھ نے جنبش نہیں کی
پھر بھی اُس کو یہ گلہ ہے کہ ستائش نہیں کی

لیاقت علی عاصم

 

[راجہ صاحب]

میں نے سمجھا تھا سمندر تم ہو
تھا کا مطلب تمھیں آتا ہو گا


فاخرہ بتول

 

[مغزل]

رہیے اب ایسی جگہ چل کر جہاں کوئی نہ ہو
کم سخن کوئی نہ اور ہم زباں کوئی نہ ہو

بے درو دیوار سا اک گھر بنا نا چاہیے
کوئی ہمسایہ نہ ہو اور پاسباں کوئی نہ ہو

پڑئیے گر بیمار ، تو کوئی نہ ہو تیماردار
اور اگر مر جائیے ، تو نوحہ خواں کوئی نہ ہو

چچا

 

[فرخ منظور]

رہیے اب ایسی جگہ چل کر جہاں کوئی نہ ہو
کم سخن کوئی نہ اور ہم زباں کوئی نہ ہو

بے درو دیوار سا اک گھر بنا نا چاہیے
کوئی ہمسایہ نہ ہو اور پاسباں کوئی نہ ہو

پڑئیے گر بیمار ، تو کوئی نہ ہو تیماردار
اور اگر مر جائیے ، تو نوحہ خواں کوئی نہ ہو

چچا

رہیے اب ایسی جگہ چل کر جہاں کوئی نہ ہو
ہم سخن کوئی نہ ہو اور ہم زباں کوئی نہ ہو

بے در و دیوار سا اک گھر بنایا چاہیے
کوئی ہم سایہ نہ ہو اور پاسباں کوئی نہ ہو

پڑیے گر بیمار تو کوئی نہ ہو بیمار دار
اور اگر مر جائیے تو نوحہ خواں کوئی نہ ہو

 

[فرخ منظور]

شب تم جو بزمِ غیر میں آنکھیں چُرا گئے
کھوئے گئے ہم ایسے کہ اَغیار پا گئے

(مومن)

 

[فرخ منظور]

ایک مُعِمّہ نہ سمجھنے کا نہ سمجھانے کا
زندگی کاہے کو ہے خواب ہے دیوانے کا

(فانی بدایونی)

 

[فرخ منظور]

ہر نفس عمرِ گذشتہ کی ہے میّت فانی
زندگی نام ہے مَر مَر کے جیے جانے کا

(فانی بدایونی)

 

[جیہ]

پہلا مصرع میرے حافظے میں کچھ اس طرح ہے

ایک مُعِمّہ ہے سمجھنے کا نہ سمجھانے کا

گرچہ میرے حافظے کا اعتبار نہیں

 

[فرخ منظور]

محبت میں ایک ایسا وقت بھی دل پر گزرتا ہے
کہ آنسو خشک ہو جاتے ہیں طغیانی نہیں جاتی

(فانی بدایونی)

 

[جیہ]

ایک شعر فانی کا مجھ سے بھی سنیں

سنے جاتے نہ تھے تم سے مرے دن رات کے شکوے
کفن سرکاؤ، میری بے زبانی دیکھتے جاؤ

 

[فرخ منظور]

پہلا مصرع میرے حافظے میں کچھ اس طرح ہے

ایک مُعِمّہ ہے سمجھنے کا نہ سمجھانے کا

گرچہ میرے حافظے کا اعتبار نہیں

میں تو ایک کتاب سے دیکھ کر لکھ رہا ہوں۔
اردو غزل مع انتخاب از ڈاکٹر یوسف حسین خاں
صدرِ شعبہ تاریخ جامعہ عثمانیہ سرکارِ عالی
(حیدرآباد دکن)

 

[فرخ منظور]

شیشۂ مے کی طرح اے ساقی
چھیڑیو مت کہ بھرے بیٹھے ہیں

(مصحفی)

 

[فرخ منظور]

کچھ موج ہوا پیچاں اے میر نظر آئی
شاید کہ بہار آئی زنجیر نظر آئی

(میر تقی میر)