بیت بازی

[نوید ملک]

وہی ہوا نا بدلتے موسم میں تم نے ہم کو بھلا دیا ہے
کوئی بھی رت ہو نہ چاہتوں کو زوال ہوگا یہ طے ہوا تھا

 

[الف عین]

آنکھ سے آنکھ نہ جوڑ کے دیکھو سوئے اُفق اے ہم سفرو!
لاکھوں رنگ نظر آئیں گے، تنہا تنہا دیکھو تم!
بانی مرحوم

 

[عمر سیف]

میں سچ کہوں گی پھر بھی ہار جاؤں گی
وہ جھوٹ بولے گا اور لاجواب کردے گا

 

[حجاب]

اتنی مدّت بعد ملے ہو کن سوچوں میں گُم پھرتے ہو
اتنے خائف کیوں رہتے ہو ہر آہٹ سے ڈر جاتے ہو ۔۔

 

[شمشاد]

آنکھ کو جام سمجھ بیٹھا تھا انجانے میں
ساقیا ہوش کہاں تھا تیرے دیوانے میں
(شمیم شاہ آبادی)

 

[شمشاد]

مجھے پھر تاخیر ہو گئی کہ حجاب مجھ سے پہلے آ گئیں۔ کوئی بات نہیں میں شعر میں حجاب لے آتا ہوں۔

وہ بےحجاب جو پی کے کل شراب آیا
اگرچہ مست تھا میں پر مجھے حجاب آیا
(بہادر شاہ ظفر)

 

[حجاب]

ایک شمع بجھائی تو کئی اور جلا لیں
ہم گردشِ دوراں سے بڑی چال چلیں ہیں
جلنا تو چراغوں کا مقدر ہے ازل سے
یہ دل کے کنول ہیں کہ بجھے ہیں نہ جلے ہیں۔

 

[عمر سیف]

نگل رہی ہے اگر تیرگی تو کیا تم لوگ
سحر کے وقت چراغوں کی لو ابھارو گے

 

[الف عین]

یہیں کہیں ترا دشمن چھپا ہے اے بانی
کوئ بہانہ بنا، بزمِ دوستاں سے نکل

 

[شمشاد]

لاکھوں کی سنا تم نے تقدیر سنواری ہے
مجھ سے یہی کہہ دیتے اب کہ تیری باری ہے
(سید شفاز شاہ چستی)

 

[عمر سیف]

یہ سال طولِ مسافت سے چور چور گیا
یہ ایک سال تو گزرا ہے اک صدی کی طرح

 

[شمشاد]

ہر منزلِ حیات سے گم کر گیا مجھے
مڑ مڑ کے راہ میں وہ تیرا دیکھنا مجھے
(ساغر نظامی)

 

[عمر سیف]

یوں جا رہا ہوں جیسے نہ آؤں گا پھر کبھی
مڑ مڑ کے دیکھتی ہے میری راہگزر مجھے

 

[شمشاد]

یہ رنگِ بہارِ عالم ہے کیا فکر ہے تجھ کو اے ساقی
محفل تو تیری سونی نہ ہوئی کچھ اٹھ بھی گئے کچھ آ بھی گئے
(مجاز لکھنوی)

 

[عمر سیف]

یاد کے بےنشاں جزیروں سے
تیری آواز آ رہی ہے ابھی

 

[شمشاد]

یہ احترامِ جنوں ہے کہ سی لیا دامن
وگرنہ اک تماشہ سا کُو بہ کُو کرتے
(حمایت علی شاعر)

 

[عمر سیف]

یوں بھی شاید مل سکے ہونے نہ ہونے کا سُراغ
اب مسلسل خود کے اندر جھانکتا رہتا ہوں میں

 

[شمشاد]

ناسور بن گیا ہے فرقت کا روگ بھی
بڑھتا ہی جا رہا ہے جتنی دوا کروں

 

[عمر سیف]

نہ جانے کس کی آمد ہے کے تارے
دور یہ مشعلیں لے کر کھڑے ہیں

 

[شمشاد]

نہ خوفِ برق نہ خوفِ شرر لگے ہے مجھے
خود اپنے باغ کے پھولوں سے ڈر لگے ہے مجھے
(ملک زادہ ‘منظور‘ احمد)