بیت بازی

[نوید صادق]

وقت نے میری ہی محنت سے اپنی ساکھ بنائی ورنی
اس کا اتنا نرخ کہاں تھا پہئے کی ایجاد سے پہلے

شاعر: طالب جوہری

 

[عمر سیف]

یار کے غم کو عجب نقش گری آتی ہے
پور پور آنکھ کی مانند بھری جاتی ہے

 

[نوید صادق]

یہ پیچ پیچ سفر مارے ڈالتا ہے مجھے
کسی کا ہاتھ تو ہے جو سنبھالتا ہے مجھے

شاعر: محشر بدایونی

 

[عمر سیف]

یہ سمندر تو اُگل دیتا ہے لاش
قصد کرنا ہے تو صحرا کیا کرے

 

[نوید صادق]

یہ تو صدیوں کے جہانوں کی کڑی ہوتی ہیں
بڑے انسانوں کی یادیں بھی بڑی ہوتی ہیں

شاعر: محشر بدایونی

 

[عمر سیف]

نہ وہ آوارگی مجھ میں، نہ وہ آشفتگی مجھ میں
میں کس معیار پہ اپنی وفا کو تول کر دیکھوں

 

[نوید صادق]

نہیں اب تیرے ملنے کا گماں بھی
قیامت ناگہاں ہو جائے گی کیا

شاعر: قابل اجمیری

 

[عمر سیف]

اگر یونہی مجھے رکھا گیا اکیلے
برآمد اور کوئی اس مکان سے ہوگا

 

[نوید صادق]

اک نظر امکاں ہزار امکاں سفر کرتی ہوئی
ایک منظر سو پرت یکسر نیا ہوتا ہوا

شاعر: بانی

 

[عمر سیف]

اگر میں پوچھتا بادل کدھر کو جاتے ہیں
جواب میں کوئی آنسو بہایا کرتا تھا

 

[نوید صادق]

ایک کنویں کی گہرائی سے مصر کے تخت شاہی تک
دیکھنے والی آنکھ کو کتنے نادیدہ بازار ملے

شاعر: طالب جوہری

 

[عمر سیف]

یہ چاند ضعف ہے جس کی زباں نہیں کھلتی
کبھی یہ چاند کہانی سنایا کرتا تھا

 

[نوید صادق]

احمد گہری سوچ کی خو کب پائی ہے
تم تو باتیں کرتے تھے اندازے سے

شاعر: سید آل احمد

 

[عمر سیف]

یہ وہی تنہائی ہے جس سے بہل جاتا تھا دِل
یہ وہی تنہائی ہے اب جس سے گھبراتا ہوں میں

 

[نوید صادق]

نیند اب چشم گرانبار کی دہلیز پہ ہے
جسم میں کھلتا ہوا خواب کا در لگتا ہے

شاعر: سعود عثمانی

 

[عمر سیف]

یہ محبّت کی کہانی نہیں مرتی لیکن
لوگ کردار نبھاتے ہوئے مر جاتے ہیں

 

[نوید صادق]

نہ ہو مایوس خشک آنکھوں سے اے دل!!
کہ صحراوں میں بھی دریا بہے ہیں

شاعر: سلیم احمد

 

[عمر سیف]

نہ ملتا ہے سرِ راہ نہ ہی وہ محفل میں‌آتا ہے
کہ اس کو جب بھی آنا ہو ہمیشہ دل میں آتا ہے

 

[نوید صادق]

یہ رات کچھ بھی نہیں تھی یہ رات سب کچھ ہے
طلوع جام سے پہلے، طلوع جام کے بعد

شاعر: قابل اجمیری

 

[عمر سیف]

دل پر پانی پینے آتی ہیں اُمیدیں
اس چشمے میں زہر ملایا جاسکتا ہے