بیت بازی

[شمشاد]

دو دلوں کواُجاڑ کے ہنسنا
یہ زمانے کی عادتیں نہ گئیں
(ایاز احمد)

 

[الف عین]

نہ دوائیں پر اثر ہیں نہ دعائیں کیا بتائیں
تجھے اپنے دل کی حالت جو بتائیں کیا بتا ئیں
اعتبار ساجد

 

[شمشاد]

نجانے کون سی رُت میں بچھڑ گئے وہ لوگ
جو اپنے دل میں بہت احترام رکھتے تھے
(نوشی گیلانی)

 

[ظفری]

یوں تو غلط نہیں ہے چہروں‌کا تاثر بھی مگر
لوگ ویسے نہیں ، جیسے نظر آتے ہیں

 

[شمشاد]

نمیَ آنکھوں سے جاتی ہی نہیں ہے
ستم اس دِل نے اِتنا سہہ لیا ہے
(نوشی گیلانی)

 

[ظفری]

یہ ٹھیک ہے کوئی مرتا نہیں جدائی میں
خدا کسی کو کسی سے مگر ، جدا نہ کرے

 

[شمشاد]

یہ آسماں میں سیاہی بکھیر دی کس نے
ہمیں تھا شوق بہت اس میں رنگ بھرنے کا
(بانی)

 

[محمد وارث]

آ کے سجادہ نشیں ہوا قیس میرے بعد
نہ رہی دشت میں خالی کوئی جا میرے بعد

میر

 

[ظفری]

اب میری دعاؤں کی ضرورت نہیں اسے
وہ شخص محبت میں خدا لگنے لگا ہے

 

[محمد وارث]

احباب سے معذرت کے پہلے غلط لفظ سے شعر لکھ دیا تھا۔ صحیح کر دیا ہے، اسی دوران میری غلطی کی وجہ سے، ظفری صاحب نے صحیح لفظ شعر لکھ دیا

یوں نہ مل مجھ سے خفا ہو جیسے
ساتھ چل موجِ صبا ہو جیسے

احسان دانش

 

[سارہ خان]

یہ اداس اداس سے بام و در یہ اجاڑ اجاڑ سی رہگزر
چلو ہم نہیں نہ سہی مگر سرِ کوئے یار کوئی تو ہو

 

[محمد وارث]

وہ کہ ہر ایک بات سے مکرتا جائے
دل وہ ظالم کہ اسی شخص پہ مرتا جائے

عالمتاب تشنہ

 

[شمشاد]

یہ نام ممکن نہیں رہے گا، مقام ممکن نہیں رہے گا
غرور لہجے میں آ گیا تو کلام ممکن نہیں رہے گا
(نوشی گیلانی)

 

[سارہ خان]

اجالے اپنی یادوں‌کے ہمارے ساتھ رہنے دو
نہ جانے کس گلی میں زندگی کی شام ہو جائے

 

[شمشاد]

یہ حکمت ملکوتی، یہ علم لا ہوتی
حرم کے درد کا درماں نہیں تو کچھ بھی نہیں

 

[عمر سیف]

نیند سے میرا تعلق ہی نہیں برسوں سے
خواب آ، آ کے مری چھت پہ ٹہلتے کیوں ہیں

 

[الف عین]

نہ جانے کیا کہا اس نے بہت ہی آہستہ
فضا کی ٹھہری ہوئی سانس پھر سے چلنے لگی
شکیب جلالی

 

[شمشاد]

یہ لوگ کیوں مجھے پہچانتے نہیں ‘محسن‘
میں سوچتا ہوں کہاں رہ گیا میرا چہرہ
(محسن نقوی)

 

[سارہ خان]

ہر طرف دیوار و در اور ان میں آنکھوں کے ہجوم
کہہ سکے جو دل کی حالت وہ لب گویا نہیں

 

[شمشاد]

نہیں تیرا نشیمن قصرِ سلطانی کے گنبد پر
تُو شاھین ہے بسیرا کر پہاڑوں کی چٹانوں میں
(علامہ)