بیت بازی

[عمر سیف]

نہ ملتا ہے سرِ راہ نہ ہی وہ محفل میں آتا ہے
کہ اس کو جب بھی آنا ہو ہمیشہ دل میں آتا ہے

 

[فرحت کیانی]

یہ شرط ہے دستک ہو اگر دستِ یقیں سے
در چھوڑ کے دیوار بھی کُھل جائے کہیں سے

 

[عمر سیف]

یاد کرکے مجھے تکلیف ہی ہوتی ہوگی
ایک قصہ ہوں پُرانا سا ، بھلا دے مجھے

 

[فرحت کیانی]

یہ ایک ابر کا ٹکڑا کہاں کہاں برسے
تمام دشت ہی پیاسا دکھائی دیتا ہے۔

 

[عمر سیف]

یاروں کو نصیب سرفرازی
مجھ کو تری گردِ راہ رہنا

 

[سارہ خان]

ادائے خاص سے غالب ہوا ہے نکتہ سرا
صلائے عام ہے یارانِ نکتہ داں کے لئے

 

[عمر سیف]

یا جاتے ہوئے مجھ سے لپٹ جاتی تھیں شاخیں
یا میرے بلانے سے صبا تک نہیں آتی

 

[الف عین]

یہ حقیر سا تحفہ ، کتنا بیش قیمت ہو جب وہ سب سے چھپ کر دے
اک اکیلے کمرے میں ننھی سیپ میں رکھ کر پیار کا سمندر دے

 

[عمر سیف]

یہ مانا بھیج دے گا ہم کو محشر سے جہنم میں
مگر جو دل پہ گزرے گی وہ دل ہی جانتا ہوگا

 

[نوید ملک]

اب سکھ ہے تو بھلانے میں ہیں
لیکن اُس شخص کو بھلائے کون

 

[سارہ خان]

نہ تیر کماں میں ہے نہ صیاد کمیں میں
گوشے میں قفس کے مجھے آرام بہت ہے

 

[عمر سیف]

یونہی شاید تسلّی ہو مری خستہ مزاجی کی
میں اپنی خاک ہی کوئے ہنر میں رول کر دیکھوں

 

[نوید ملک]

نیم شب کی خامشی میں بھیگتی سڑکوں پہ کل
تیری یادوں کے جلو میں‌گھومنا اچھا لگا

 

[عمر سیف]

احساس کی قندیل سے روشن ہو جس کا دل
اس کو کبھی جگنو کی ضرورت نہیں رہی

 

[نوید ملک]

یہ راہ اکیلی کاٹی ہے یاں ساتھ نہ کوئی یار چلے
اُس پار نہ جانے کیا پائیں اِس پار تو سب کچھ ہار چلے

 

[عمر سیف]

یہ عنایتیں غضب کی یہ بلا کی مہربانی
میری خیریت بھی پوچھی کسی اور کی زبانی

 

[سارہ خان]

یہ کہاں کی دوستی ہے بنے ہیں دوست ناصح
کوئی چارہ ساز ہوتا کوئی غمگسار ہوتا

 

[الف عین]

اب کے ہم بچھڑیں تو شاید کبھی خوابوں میں ملیں
جس طرح سوکھے ہوئے پھول کتابوں میں ملیں
فراز

 

[سارہ خان]

نہیں فرصت یقیں مانو ہمیں کُچھہ اور کرنے کی
تیری باتیں تیری یادیں بہت مصروف رکھتی ہیں

 

[نوید ملک]

نہ تجھ سے ہے نہ گلہ آسمان سے ہو گا
تری جدائی کا جھگڑا جہان سے ہو گا