دل کے موضوع پر اشعار!

[عمر سیف]

تو اب میرے دل پہ جبر کیسا؟
یہ دل تو حد سے گزر چکا ہے

 

[نوید صادق]

دل مرا ہے تو قافلہ سالار
پر مصیبت کے کارواں کا ہے

شاعر: جرات

 

[عمر سیف]

دلوں کے سودے میں نقصان ہو بھی سکتا ہے
شعور تھا تو سہی میرے کام آیا نہیں

 

[محمد وارث]

دل میں ذوقِ وصل و یادِ یار تک باقی نہیں
آگ اس گھر میں لگی ایسی کہ جو تھا، جل گیا

(قبلہ و کعبہ)

 

[شمشاد]

یہ لوگ تماشا ہیں تو پھر ان سے جنوں میں
کوئی بھی بیاں دل کی حکایت نہیں کی جائے
(نوشی گیلانی)

 

[عمر سیف]

اگر یقین ہو انصاف کا تو پھر اس کا
دلوں کی دھجیاں جسموں کے تار دکھلاؤں

 

[محمد وارث]

اس دل کے دریدہ دامن کو، دیکھو تو سہی، سوچو تو سہی
جس جھولی میں سو چھید ہوئے، اس جھولی کا پھیلانا کیا

پھر ہجر کی لمبی رات میاں، سنجوگ کی تو یہی ایک گھڑی
جو دل میں ہے لب پر آنے دو، شرمانا کیا، گھبرانا کیا

ابنِ انشا

 

[عمر سیف]

دل بہلتا ہے کہاں‌ انجم و مہتاب سے بھی
اب تو ہم لوگ گئے دیدہء بےخواب سے بھی

 

[نوید صادق]

ہمارے آگے ترا جب کسو نے نام لیا
دلِ ستم زدہ کو ہم نے تھام تھام لیا

شاعر: میر تقی میر

 

[محمد وارث]

دلوں کو مرکزِ مہر و وفا کر
حریمِ کبریا سے آشنا کر
جسے نان جویں بخشی ہے تو نے
اسے بازوے حیدر بھی عطا کر

اقبال

 

[عمر سیف]

کہنے کو رہتے ہو دل میں
پھر بھی کتنے دور کھڑے ہو

 

[شمشاد]

یہ دل بھُلاتا نہیں ہے محبتیں اُس کی
پڑی ہُوئی تھیں مُجھے کِتنی عادتیں اُس کی
(نوشی گیلانی)

 

[نوید صادق]

باندھتے ہیں اپنے دل میں زلفِ جاناں کا خیال
اس طرح زنجیر پہناتے ہیں دیوانے کو ہم

شاعر: ناسخ

 

[عمر سیف]

وہ اب لاکھوں دلوں ‌سے کھیلتا ہے
مجھے پہچان لے اتنا بہت ہے

 

[نوید صادق]

دل سے آنکھوں میں لہو آتا ہے شاید رات کو
کش مکش میں بے قراری کی یہ پھوڑا چِھل گیا

شاعر: میر

 

[عمر سیف]

کھلا ہے دل کا دریچہ اسی کی دستک پر
جو مجھ کو میری نگاہوں سے دیکھتا بھی ہے

 

[نوید صادق]

ہر چند کہ سنگ دل ہے شیریں
لیکن، فرہاد کوہکن ہے

شاعر: میر درد

 

[شمشاد]

وہ جن کے آنچلوں سے زندگی تخلیق ہوتی ہے
دھڑکتا ہے ہمارا دل ابھی تک ان حسینوں میں
(قتیل شفائی)

 

[عمر سیف]

سکونِ دل سے اس کا واسطہ کیا
تری جس پر عنایت ہو گئی ہے

 

[نوید صادق]

بے اثر کب یہ چاہ ہوتی ہے
دل سے اک دل کو راہ ہوتی ہے

شاعر: نواب شوق