دیئے گئے لفظ پر شاعری - دوسرا دور

[شکیل احمد خان23]

سفر ہے شرط مسافرنواز بہتیرے
ہزار ہا شجر ِ سایہ دار۔۔۔ راہ میں ہے
خواجہ حیدر علی آتش کے اکثراشعار میں ضرب المثل کی خوبی ہے ۔اسی شعر میں دیکھیے ’’سفر ہے شرط‘‘ یعنی حرکت میں برکت ہے ،’’مسافر نواز بہتیرے‘‘یعنی دنیا میں اچھے لوگوں کی کمی نہیں،’’شجر ِ سایہ دار‘‘ محبت اور شفقت سے پیش آنیوالی ہستیاں۔
میں

 

[شکیل احمد خان23]

میں تجھ کو بتا تا ہوں۔ تقدیر ِ اُمم کیا ہے
شمشیر و سِناں اوّل ، طاؤس و رَباب آخر۔۔۔۔۔(اِس شعر میں تقدیر ِ امم، شمشیر و سِناں ، طاؤس و رباب کو تلمیحات سمجھیں اور میں وقت کا اِستعارہ ہوں )
یہی بات سرسید احمدخاں نے اپنے مضمون ’’رسم و رواج کی پابندی کے نقصانات ‘‘میں اپنے ڈھب سے کہی ہے :’’تواریخ سے ثابت ہے کہ ایک قوم کسی قدر عرصہ تک ترقی کی حالت پر رہتی ہے اور اِس کے بعد ترقی مسدود ہوجاتی ہے مگر یہ دیکھنا ہے کہ یہ ترقی کب مسدود ہوتی ہے ۔یہ اُسی وقت مسدود ہوتی ہے جبکہ اُس قوم میں سے وہ قوت اُٹھ جاتی ہے ، جس کے سبب سے نئی نئی باتیں پیدا ہوتی ہیں۔‘‘

آخر

 

[سیما علی]

حصہ اول : 1905 تک ( بانگ درا)
سختیاں کرتا ہوں دل پر غیر سے غافل ہوں میں
ہائے کیا اچھی کہی ظالم ہوں میں جاہل ہوں میں

میں جبھی تک تھا کہ تیری جلوہ پیرائی نہ تھی
جو نمود حق سے مٹ جاتا ہے وہ باطل ہوں میں

علم کے دریا سے نکلے غوطہ زن گوہر بدست
وائے محرومی خذف چین لب ساحل ہوں میں

ہے مری ذلت ہی کچھ میری شرافت کی دلیل
جس کی غفلت کو ملک روتے ہیں وہ غافل ہوں میں

بزم ہستی اپنی آرائش پہ تو نازاں نہ ہو
تو تو اک تصویر ہے محفل کی اور محفل ہوں میں

ڈھونڈھتا پھرتا ہوں میں اقبالؔ اپنے آپ کو
آپ ہی گویا مسافر آپ ہی منزل ہوں میں

منزل

 

[سیما علی]

میں تجھ کو بتا تا ہوں۔ تقدیر ِ اُمم کیا ہے
شمشیر و سِناں اوّل ، طاؤس و رَباب آخر۔۔۔۔۔(اِس شعر میں تقدیر ِ امم، شمشیر و سِناں ، طاؤس و رباب کو تلمیحات سمجھیں اور میں وقت کا اِستعارہ ہوں )
یہی بات سرسید احمدخاں نے اپنے مضمون ’’رسم و رواج کی پابندی کے نقصانات ‘‘میں اپنے ڈھب سے کہی ہے :’’تواریخ سے ثابت ہے کہ ایک قوم کسی قدر عرصہ تک ترقی کی حالت پر رہتی ہے اور اِس کے بعد ترقی مسدود ہوجاتی ہے مگر یہ دیکھنا ہے کہ یہ ترقی کب مسدود ہوتی ہے ۔یہ اُسی وقت مسدود ہوتی ہے جبکہ اُس قوم میں سے وہ قوت اُٹھ جاتی ہے ، جس کے سبب سے نئی نئی باتیں پیدا ہوتی ہیں۔‘‘

آخر

کیا بات ہے بھیا دونوں نے علامہ کا کلام منتخب کیا👏👏

 

[سیما علی]

دل ناداں تجھے ہوا کیا ہے
آخر اس درد کی دوا کیا ہے

ہم ہیں مشتاق اور وہ بیزار
یا الٰہی یہ ماجرا کیا ہے

میں بھی منہ میں زبان رکھتا ہوں
کاش پوچھو کہ مدعا کیا ہے

جب کہ تجھ بن نہیں کوئی موجود
پھر یہ ہنگامہ اے خدا کیا ہے

ہنگامہ

 

[فوزیہ افضل]

اک ہنگامہ پہ موقوف ہے گھر کی رونق
نوحہؑ غم ہی سہی نغمہ شادی نہ سہی

گھر

 

[سیما علی]

پس غبار بھی اڑتا غبار اپنا تھا
ترے بہانے ہمیں انتظار اپنا تھا
عباس تابش

انتظار

 

[فوزیہ افضل]

باغ بہشت سے مجھ کو حکم سفر دیا تھا کیوں
کار جہاں دراز ہے اب میرا انتظار کر

باغ

 

[شکیل احمد خان23]

میں رونا روؤں اب اُس کا یا خود اُسے روؤں
مرا وہ دل جسے۔۔۔۔۔۔۔۔۔۔ باغ و بہار کہتے تھے

۔۔۔۔۔۔یا۔۔۔۔۔۔

 

[فوزیہ افضل]

یا ہم کو تو عادی نہ بنا تیرگیوں کا
یا اس طرح یکلخت اجالے نہ دیا کر

تیرگی

 

[شمشاد]

گزرنے پاتی تو شاداب ہو بھی سکتی تھی
یہ تیرگی جو مری زیست کا مقدر ہے
ساحر لدھیانوی

زیست

 

[سیما علی]

اس کے غم کو غمِ ہستی تو مرے دل نہ بنا
زیست مشکل ہے اسے اور بھی مشکل نہ بنا

تو بھی محدود نہ ہو مجھ کو بھی محدود نہ کر
اپنے نقشِ کف پا کو مری منزل نہ بنا

اور بڑھ جائے گی ویرانیِ دل جانِ جہاں
میری خلوت گہہ خاموش کو محفل نہ بنا

دل کے ہر کھیل میں ہوتا ہے بہت جاں کا زیاں
عشق کو عشق سمجھ ، مشغلہ ِدل نہ بنا

پھر مری آس بندھا کر مجھے مایوس نہ کر
حاصلِ غم کو خدارا غمِ حاصل نہ بنا

حمایت علی شاعر
حاصلِ غم

 

[فوزیہ افضل]

حاصل غم یہی سمجھتے ہیں
موت کو زندگی سمجھتے ہیں
جس کو تیرے الم سے نسبت ہے
ہم اسی کو خوشی سمجھتے ہیں
تم ستم میں کمی نہ فرماؤ
ہم اسے دشمنی سمجھتے ہیں

خوشی

 

[شکیل احمد خان23]

خوشی دو گھڑی کی ملے ملے نہ ملے
شمع آرزو کی۔۔ ۔۔۔جلے جلے نہ جلے

نہ

 

[شمشاد]

اجالے اپنی یادوں کے ہمارے ساتھ رہنے دو
نہ جانے کس گلی میں زندگی کی شام ہو جائے
بشیر بدر

گلی

 

[سیما علی]

اس کے وصال کے لیے، اپنے کمال کے لیے
حالتِ دل کہ تھی خراب، اور خراب کی گئی

تیرا فراق جانِ جاں، عیش تھا کیا مرے لیے
یعنی ترے فراق میں، خوب شراب پی گئی

اس کی گلی سے اٹھ کے میں، آن پڑا تھا اپنے گھر
ایک گلی کی بات تھی، اور گلی گلی گئی
جون ایلیا

گھر

 

[شکیل احمد خان23]

گھر کے چراغ روشن ہیں آج اہلِ محبت کے نام
کتنی حسیں میری زمیں۔۔،۔۔ میرے لہو کا سلام۔۔(عبیداللہ علیم)

ہیں

 

[عظیم]

کہتے ہیں عشق نام کے گزرے ہیں اک بزرگ
ہم لوگ بھی مرید اسی سلسلے کے ہیں

( یہ شعر اکثر کہیں اور طرح بھی نظر سے گزرا ہے، معلوم نہیں کہ اصل شعر کیا ہے اور کس کا ہے )


لوگ

 

[فوزیہ افضل]

نام تو نام مجھے شکل بھی اب یاد نہیں
ہائے وہ لوگ وہ اعصاب پہ چھائے ہوئے لوگ

نام

 

[سیما علی]

میں تیرا نام نہ لوں پھر بھی لوگ پہچانیں
کہ آپ اپنا تعارف ہَوا بہار کی ہے

تعارف