شعر و شاعر (اشعار اور خالق)

[طارق شاہ]

تیری گلی میں مَیں نہ چَلوُں اور صبا چَلے
یُوں ہی ، خُدا جو چاہے تو بندے کی کیا چلے

خواجہ میر درؔد

 

[طارق شاہ]

کہہ بیٹھیو نہ درؔد ، کہ اہلِ وفا ہُوں مَیں
اُس بے وَفا کے آگے جو ذکرِ وَفا چَلے

خواجہ میر درؔد

 

[طارق شاہ]

نہ کہی کبھی بھی ضمیر کی ، نہ ہی سچ تھا مجھ سے لکھا گیا
کہ زباں مِری تھی کٹی ہُوئی ، تھا قلم بھی میرا بکا ہُوا

اقبال اشہر

 

[طارق شاہ]

وہ جو سُرخ سُرخ نِشان تھے مِری گمرہی کا بیان تھے
تِرے قافلے نے پڑھے نہیں ،مِرے آبلوں کا لِکھا ہُوا

اقبال اشہر

 

[طارق شاہ]

حَسِیں ایسی، زبانِ خلق کے قصّے میں رہتی ہے
تجسّس ہے سبھی کو کِس کے وہ حصّے میں رہتی ہے

جسارت ماہ بینی کی خلؔش اُس پر نہیں کرنا
مُسَلسَل خود پہ نظروں سے ہی وہ غصّے میں رہتی ہے

شفیق خلؔش

 

[وقار علی ذگر]

کس سے ذکر غمِ حیات کریں
وہ نگاہیں اٹھیں تو بات کریں

رسا چغتائی

 

[طارق شاہ]

رُکا رُکا تِرے لب پر عجب سُخن تھا کوئی
تِری نِگہ بھی جسے ناتمام چھوڑ گئی

مجید امجدؔ

 

[طارق شاہ]

کسی کی رُوح تک اِک فاصلہ خیال کا تھا
کبھی کبھی تو یہ دُوری رہی سہی بھی نہ تھی

مجید امجؔد

 

[طارق شاہ]

دِل وہ شے ہے، جس کا شاکی !
کھونے والا، پانے والا

نوح ناروی

 

[طارق شاہ]

کیا حُسن کہوں، اللہ رے حُسن اُس رشک پری کی صُورت پر
انسان رہے کِس گنتی میں، جب حُور َملک قربان گئے

نظؔیر اکبر آبادی

 

[کاشفی]

کعبے میں مسلمان کو کہہ دیتے ہیں کافر
بت خانے میں کافر کو بھی کافر نہیں کہتے
(بسمل سعیدی - شاگرد سیماب اکبر آبادی)

 

[کاشفی]

کسی کے ستم اس قدر یاد آئے
زباں تھک گئی مہرباں کہتے کہتے
(بسمل سعیدی)

 

[کاشفی]

سر جس پہ نہ جھک جائے اسے در نہیں کہتے
ہر در پہ جو جھک جائے اسے سر نہیں کہتے
(بسمل سعیدی)

 

[کاشفی]

تم جب آتے ہو تو جانے کے لیے آتے ہو
اب جو آکر تمہیں جانا ہو تو آنا بھی نہیں
(بسمل سعیدی)

 

[کاشفی]

زمانہ سازیوں سے میں ہمیشہ دور رہتا ہوں
مجھے ہر شخص کے دل میں اُتر جانا نہیں آتا
(بسمل سعیدی)

 

[وقار علی ذگر]

الزام تراشیں تو الزام تراشیں کیا
احباب سمجھتے ہیں الزام تراشیں کیوں

کچھ دور تو چلنے دو، خود لوگ سمجھ لیں گے
رہبر ہیں کہ رہزن ہیں ہم نام تراشیں کیوں

رسا چغتائی​

 

[کاشفی]

ہوگا تمہارا نام ہی عنوانِ ہر وَرَق
اوراقِ زندگی کو اُلٹ دیں کہیں سے ہم
(بسمل سعیدی)

 

[کاشفی]

ہمیں ہے شوق کہ بےپردہ تم کو دیکھیں گے
تمہیں ہے شرم تو آنکھوں پہ ہاتھ دھر لینا
(داغ دہلوی رحمتہ اللہ علیہ)
سبحان اللہ بہت خوبصورت شعر ہے۔۔

 

[کاشفی]

میرا قاتل ہی میرا منصف ہے
کیا مرے حق میں فیصلہ دے گا
(سدرشن فاکر)

 

[طارق شاہ]

جب بُلائے گا خُدا تو اُس کے گھر بھی جاؤں گا
بِن بُلائے تو کسی کے گھر نہیں جاتا ہُوں میں

باقؔر زیدی