شعر و شاعر (اشعار اور خالق)

[طارق شاہ]

کُشادہ دل ہیں، سِتم سے رہے ہیں کب خائف
کریں وہ ظُلم بھی ہم پرجو ٹھان بیٹھے ہیں

شفیق خلشؔ

 

[طارق شاہ]

آنکھ رنجیدگی سے بھر آئی
آج سُننے کو وہ خبر آئی

بشیر بدؔر

 

[طارق شاہ]

خُدا کرے، وہ حقیقت میں ہم کو ہوں حاصل
جنھیں ہم اپنا تصوّر میں مان بیٹھے ہیں

شفیق خلؔش

 

[طارق شاہ]

نہ پہنچے گا انجام کو یہ تَسَلسَل
تمھاری جفائیں، ہماری وفائیں

سراؔج اورنگ آبادی

 

[طارق شاہ]

دو زُلفوں نے گھیرا ہے چہرہ کو تیرے
بَلائیں بھی لیتی ہیں تیری بَلائیں

سراؔج اورنگ آبادی

 

[طارق شاہ]

مِری تلخیِ نزع کی ہیں دَوائیں
تمھارے تبسّم کی میٹھی ادائیں

سراؔج اورنگ آبادی

 

[طارق شاہ]

کب سماں دیکھیں گے ہم زخموں کے بھر جانے کا
نام لیتا ہی نہیں وقت گُزرجانے کا

شہریاؔر

 

[طارق شاہ]

سوچتے ہی رہے، پُوچھیں گے تیری آنکھوں سے
کِس سے سِیکھا ہے ہُنر دِل میں اُتر جانے کا

شہریاؔر

 

[طارق شاہ]

باغ، پُھول، پتّے، کھیت، چاند، آسماں، تارے
یُوں تو کتنے ساتھی ہیں، دِل مگر اکیلا ہے

اعجاز عبؔید

 

[کاشفی]

یہ مال اک ڈاکے میں کل دونوں نے مل کر لوٹا ہے
انصاف اب یہ کہتا ہے آدھا مرا آدھا ترا
(دلاور فگار)

 

[کاشفی]

عجیب شخص ہے ناراض ہو کے ہنستا ہے
میں چاہتا ہوں خفا ہو تو وہ خفا ہی لگے
(بشیر بدر)

 

[طارق شاہ]

عِشق نے خُوں کِیا ہے دِل جِس کا
پارۂ لعل اشک ہے تِس کا

سراؔج اورنگ آبادی

 

[طارق شاہ]

مُنہ تکا ہی کرے ہے جِس تِس کا
حیرَتی ہے یہ آئینہ کِس کا

مِیر تقی مِیؔر

 

[طارق شاہ]

چشمِ ساقی کے وصف لکھتا ہُوں
لے قلم ہاتھ شاخِ نرگس کا

سراؔج اورنگ آبادی

 

[طارق شاہ]

داغ آنکھوں سے کِھل رہے ہیں سب
ہاتھ دستہ ہُوا ہے نرگس کا

مِیر تقی مِیؔر

 

[طارق شاہ]

تُم نے پائے ہو حُسن کی دَولت
پُوچھتے کب ہو حال مُفلِس کا

سراؔج اورنگ آبادی

 

[طارق شاہ]

شام ہی سے بُجھا سا رہتا ہے
دِل ہُوا ہے چراغ مُفلِس کا

مِیر تقی مِیؔر

 

[طارق شاہ]

بیکسی مجھ سے آشنا ہے سِراؔج !
نہیں تو عالَم میں کون ہے کِس کا

سراؔج اورنگ آبادی

 

[طارق شاہ]

تاب کِس کو جو حالِ مِیؔر سُنے
حال ہی اور کُچھ ہے مجلِس کا

مِیر تقی مِیؔر

 

[طارق شاہ]

دیکھا ہےجِن نے تیرے رُخسار کا تماشا
دیکھے نہیں وہ سُورج جھلکار کا تماشا

اے رشکِ باغِ جنّت! جب سے جُدا ہُوا تُو
دَوزخ ہے تب سے مجھ کو گُلزار کا تماشا

نرگس میں اب نہیں ہے پَل مارنے کی طاقت !
آ دیکھ اِس انکھاں کے بیمار کا تماشا

تب سے ولؔی کا مطلب جا بیچ میں پڑا ہے !
دیکھا ہے جب سے تیری دستار کا تماشا

ولؔی دکنی