شعر و شاعر (اشعار اور خالق)
- صاحب لڑی طارق شاہ
- تاریخ ابتداء
-
- ٹیگ
- شعر و شاعر ، طارق شاہ
طارق شاہ
محفلین
جذبِ اُلفت، پَردَہ دارِ رُوئے زیبا کیوں نہ ہو
میرے دِل کے آئینے میں تیرا نقشہ کیوں نہ ہو
بے حجابی رُوکشِ چشمِ تمنّا کیوں نہ ہو !
جس کو آنکھیں دے خُدا، محوِ تجلّی کیوں نہ ہا
کیا حیا ہے، نیچی نظروں کے تصدّق جائیے
تم نہ آنکھ اپنی اُٹھانا ، کوئی مرتا کیوں نہ ہو
بات جب بننے بھی دے برگشتگی تقدِیر کی !
مَیں بجا بھی کُچھ کہوں اُن سے ، تو بیجا کیوں نہ ہو
خاطؔر لکھنوی
( مُنشی سیّد ظفر حَسن )
طارق شاہ
محفلین
آنسو ٹپک پڑے جو مِری اِلتجا کے ساتھ
کُچھ رحم کھا کے ہو لئے وہ مُسکرا کے ساتھ
جویائے معرفت ہو تو باطن پہ نظر کر
کب تک چلے گا شیخ! یہ تقوٰی ریا کے ساتھ
قاتِل نہ توڑ آس ہماری دَمِ اَخِیر
تِیرِ نگاہ بھی کوئی تیغِ ادا کے ساتھ
تقدِیر کی ہے بات جو اَب بھی نہ ہو قبوُل
آمِین کہہ رہے ہیں وہ میری دُعا کے ساتھ
خاطؔر لکھنوی
( مُنشی سیّد ظفر حَسن )
طارق شاہ
محفلین
عِشق جب زمزمہ پیرا ہوگا
حُسن خود محوِ تماشا ہوگا
دائم آباد رہے گی دُنیا !
ہم نہ ہوں گے کوئی ہم سا ہوگا
ہم تُجھے بُھول کے خوش بیٹھے ہیں
ہم سا بے درد کوئی کیا ہوگا
پھر کسی دھیان کے صد راہے پر
دلِ حیرت زَدَہ تنہا ہوگا
شام سے سوچ رہا ہُوں، ناصؔر !
چاند کِس شہر میں اُترا ہوگا
ناصؔر کاظمی