عید اور چاند رات کے موضوعات پر اشعار!

[فرقان احمد]

شکر خدا ہے پیشِ نظر جلوہ عید کا
مشتاق دل تھا میرا بہت جس کی دید کا
اب دیر کیا ہے، آؤ گلے مل لو شوق سے
ساعت بھی نیک، دن بھی مبارک ہے عید کا

 

[فرقان احمد]

میرے یاروں کو مبارک عید ہو
غم گساروں کو مبارک عید ہو
عاشق و معشوق، رند و پارسا
آج چاروں کو مبارک عید ہو

 

[فرقان احمد]

صبا مژدہء عید لائی ہے آج
تمنا دلوں کی بر آئی ہے آج
مِرے دوست تم کو مبارک یہ روز
بہت شاد ساری خدائی ہے آج

 

[عبد الرحمٰن]

چاند رات آئے تو سب دیکھیں ہلال عید کو​

اک ہمارا ہی نصیب ہڈیاں تڑوا گیا!​

چھت پہ ہم تھے چاند کے نظارے میں کھوئے ہوئے​

بس اچانک چاند کا ابا وہاں پہ آ گیا​

 

[عبد الرحمٰن]

آئی عید و دل میں نہیں کچھ ہوائے عید
اے کاش میرے پاس تو آتا بجائے عید
حاتم شیخ ظہور الدین

 

[عبد الرحمٰن]

اپنی خوشیاں بھول جا سب کا درد خرید
سیفیؔ تب جا کر کہیں تیری ہوگی عید
سیفی سرونجی

 

[عبد الرحمٰن]

دلوںمیں پیار جگانے کو عید آئی ہے
ہنسو کہ ہنسنے ہنسانے کو عید آئی ہے
مسرتوں کے خزانے دیئے خدا نے ہمیں
ترانے شکر کے گانے کو عید آئی ہے
مہک اٹھی ہے فضا پیرہن کی خوشبو سے
چمن دلوں کا کھلانے کو عید آئی ہے
خوشا کہ شیر و شکر ہو گئے گلے مل کر
خلوص دل ہی دکھانے کو عید آئی ہے
اٹھا دو دوستو اس دشمنی کو محفل سے
شکایتوں کے بھلانے کو عید آئی ہے
کیا تھا عہد کہ خوشیاں جہاں میں بانٹیں گے
اسی طلب کے نبھانے کو عید آئی ہے

 

[عبد الرحمٰن]

جس عید میں کہ یار سے ملنا نہ ہو نظیرؔ
اس کے اپر تو حیف ہے اور صد ہزار آہ

 

[عبد الرحمٰن]

ہماری عید ہے ہم ہر طرح منائیں گے​

ہمیں شیخ کے فتوے پہ اعتبار نہیں​

ہمارے ڈپٹی کمشنر نے چاند دیکھا ہے​

ہمیں خبر ہے کہ وہ غیر ذمہ دار نہیں​

 

[عبد الرحمٰن]

آج بھر عید کارڈمیں اُس نے​

لفظ اک بے دھیان لکھا ہے،​

عید پھر میری کرکری کر دی​

مُجھ کو بھر بھائی جان لکھا ہے​

 

[عبد الرحمٰن]

آپ ادھر آئے ادھر دین اور ایمان گئے
عید کا چاند نظر آیا تو رمضان گئے
شجاع خاور

 

[عبد الرحمٰن]

بادباں ناز سے لہرا کے چلی باد مراد
کارواں عید منا قافلہ سالار آیا
جوشؔ ملیح آبادی

 

[عبد الرحمٰن]

عید ہے قتل مرا اہل تماشا کے لیے
سب گلے ملنے لگے جب کہ وہ جلاد آیا
داغؔ دہلوی

 

[عبد الرحمٰن]

جناب کے رخ روشن کی دید ہو جاتی
تو ہم سیاہ نصیبوں کی عید ہو جاتی
انور شعور

 

[عبد الرحمٰن]

کہیں ہے عید کی شادی کہیں ماتم ہے مقتل میں
کوئی قاتل سے ملتا ہے کوئی بسمل سے ملتا ہے
ترجمہ داغؔ دہلوی

 

[عبد الرحمٰن]

مہک اٹھی ہے فضا پیرہن کی خوشبو سے
چمن دلوں کا کھلانے کو عید آئی ہے
محمد اسد اللہ

 

[عبد الرحمٰن]

میرے سرخ لہو سے چمکی کتنے ہاتھوں میں مہندی
شہر میں جس دن قتل ہوا میں عید منائی لوگوں نے
بہادر شاہ ظفر

 

[عبد الرحمٰن]

میری خوشیوں سے وہ رشتہ ہے تمہارا اب تک
عید ہو جائے اگر عید مبارک کہہ دو
نعمان شوق

 

[فرقان احمد]

پلکوں پہ حسرتوں کے ستارے سجا لیے
اس دھج سے خواہشوں نے کیا اہتمام عید

 

[فرقان احمد]

ایک لمحے کو کبھی میں نے تجھے دیکھا تھا
عمر بھر میری نظر میں نہ جچا عید کا چاند