محترم بھائی
" آمد " کو تسلیم جب کر لیا آپ نے تو پھر اس مراسلے پر اعتراض کیسا ؟
جبکہ آپ خود ہی لکھ رہے ہیں کہ " اوزان " پورے ہیں ۔
شاعر نے جان بوجھ کر قافیے سے پہلوتہی کی ۔ اور یہ شاعر کی غلطی ہے ۔
تو میرے محترم بھائی ہو سکتا ہے کہ شاعر کو اس قطعے کی اسی صورت میں آمد ہوئی ہو ۔
اور اس نے اسے قافیے میں پرونے کی کوشش بھی کی ہو لیکن قافیے میں بندھ کر ابلاغ ہی سکوت کا شکار ہو رہا ہو ۔
سو شاعر نے اسے ایسی ہی صورت میں قاری کے سامنے پیش کر دیا ۔
اور " آمد خیال " کو کسی قطع و برید سے محفوظ رکھا ۔
نایاب صاحب شاید میں اپنی بات سمجھا نہیں پا رہا۔
قبلہ کوئی بھی آمد حدود و قیود سے باہر اگر ہوتی ہے تو اسے ان حدود میں لے آیا جاتا ہے، میری بات پر یقین نہ ہو تو کسی ایسے آدمی سے پوچھ لیں جس پر آپ شعر و شاعری کے معاملات میں یقین رکھتے ہوں۔
جس چیز کو تبدیل نہ کرنے کی بات کی جا رہی ہے وہ اس آمد کی نوک پلک سنوارنے کی بات ہے۔ یعنی وہ تمام حدود و قیود و اصول و ضوابط کے مطابق کلام ہوتا ہے لیکن پھر بھی اس کی نوک پلک سنوارنے اور اسے بہتر سے بہتر بنانے کی گنجائش بہرحال موجود ہوتی ہے۔ بہت سے ناموروں شاعروں کی مثالیں موجود ہیں کہ پہلے شعر انہوں نے کچھ اور طرح سے کہا، کچھ عرصے کے بعد اس کو بدل دیا، کتاب طبع ہونے کی باری آئی تو مزید بدل دیا۔ اور کچھ بالکل بھی ایسا نہیں کرتے، ایک ہی بار جو کہہ دیا سو کہہ دیا ۔ میں بھی عموما اپنی اشعار تبدیل نہیں کرتا لیکن جہاں بہت ضروری ہو کر بھی لیتا ہوں، اس میں کیا ہے؟ یہ تو شاعروں کی مرضی اور صوابدید ہے کہ اپنے کلام سے جو چاہے سلوک کریں لیکن وہ" کلام" تو ہو۔
اگر ہر آمد کو شاعری ماننا ہے تو بچے کی قلقاریاں اور بے ربط جملوں سے زیادہ سچی آمد کس کی ہو سکتی ہے؟ لیکن کیا کوئی سلیم الطبع آدمی اسے شاعری تسلیم کرتا ہے؟ آپ کرتے ہیں تو کرتے رہیں لیکن مجھ سے زبردستی تو نہ منوائیں۔
میرے خیال میں اس موضوع پر میں نے جو کچھ کہنا تھا کہہ چکا، لکم دینکم ولی دین۔
