"یاد" کے موضوع پر اشعار!

[شمشاد]

داد دیتا ہے مرے زخمِ جگر کی، واہ وا
یاد کرتا ہے مجھے، دیکھے ہے وہ جس جا نمک
(غالب)

 

[عمر سیف]

میری حالت دیکھ لو تغیر کتنی ہو چکی
وصل کے دن دَمبَدم کیوں شیشہِ ساعت کی یاد

 

[شمشاد]

آہ وہ جراءتِ فریاد کہاں
دل کے پردے میں جگر یاد آیا
(غالب)

 

[عمر سیف]

اس دفعہ ساون میں تیری یاد کے بادل رہے
اس دفعہ میں خوب رویا بارشوں کے ساتھ ساتھ

 

[شمشاد]

یاد ہے شادی میں عقدِ نالۂ یارب مجھے
سبحۂ زاہد ہوا ہے خندہ زیرِ لب مجھے
(غالب)

 

[سارہ خان]

کوئی موسم ہو ہجر کا
ہم تمھیں یاد رکھتے ہیں
تیری باتوں سے اِس دِل کو
بہت آباد رکھتے ہیں
کھبی دِل کے صحیفے پر
تجھے تصویر کرتے ہیں
کھبی پلکوں کی چھاوٰں میں
تجھے زنجیر کرتے ہیں
کھبی خوابیدہ شاموں میں
کھبی بارش کی راتوں میں
کوئی موسم ہو وصل کا
تمھیں ہم یاد رکھتے ہیں
تیری باتوں سے اِس دل کو
بہت آباد رکھتے ہیں

 

[شمشاد]

مُٹھی میں خواب، یادوں کی راکھ سی بتول
میری طرف اُچھال کے منظر بدل گئے
(فاخرہ بتول)

 

[عمر سیف]

ایسا لگتا ہے کہ ہر موسمِ ہجراں میں بہار
ہونٹ رکھ دیتی ہے شاخون پہ تمھارے لے کر
شہر والوں کا کہاں یاد ہے وہ خواب فروش
پھرتا رہتا تھا جو گلیوں میں غبارے لے کر

 

[شمشاد]

چاند گھٹتا ہی گیا جتنا تجھے یاد کیا
درد بڑھتا ہی گیا جتنا تجھے یاد کیا
(فاخرہ بتول)

 

[عمر سیف]

یاد کے دائرے کیوں پھیلتے جاتے ہیں شکیب
اس نے تالاب میں کنکرا ابھی پھینکا ہی نہیں

 

[شمشاد]

‘عالی‘ کس کو ضرورت ہے اک تمہیں کو رونے کی
جیسے سب یاد آتے ہیں، تم بھی یاد آ جاؤ گے

 

[عمر سیف]

ایک سلگتی یاد، چمکتا درد، فروزاں تنہائی
پوچھ نہ اُس کے شہر سے ہم کیا کیا سوغاتیں لائے ہیں

 

[الف عین]

کس کی طلب کہاں کا کبوتر کہاں کی یاد
تحریر شوق و شکوہ غلط، نامہ بر غلط
بیان میرٹھی

 

[عمر سیف]

تری یادوں کی خوشبو کھڑکیوں میں رقص کرتی ہے
ترے غم میں سُلگتا ہوں تو آنکھیں بھیگ جاتی ہیں

 

[شمشاد]

مسئلہ پہلے سلجھانے کی امید نہ تھی
اور اُلجھتا ہی گیا جتنا تجھے یاد کیا
(فاخرہ بتول)

 

[عمر سیف]

اک یاد ہے کہ دامن دل چھوڑتی نہیں
اک بیل ہے کہ لپٹی ہوئی ہے شجر کے ساتھ

 

[شمشاد]

کاش ہم تجھ کو بُھلا دیتے تو اچھا تھا
بخت ڈھلتا ہی گیا جتنا تجھے یاد کیا
(فاخرہ بتول)

 

[عمر سیف]

اسی خوشبو سے کسی کی یاد کے در کھلتے ہیں
میرے پیروں سے جو لپٹے تو سفر کھلتے ہیں

 

[محمد وارث]

سوچے تھا اہلِ جرم سے کس کو کروں میں قتل
اتنے میں اس کو یاد میرا نام آ گیا

شیخ غلام ہمدانی مُصحفی

 

[عمر سیف]

رات ہمیں کچھ یاد نہیں تھا
رات بہت ہی یاد آئے ہو!