لفظِ ”اردو“ پر مشتمل اشعار پیش کریں(کسی بھی زبان کے)

[زیرک]

کوئی بتلائے ''خلش'' کا مطلب
کتنی مشکل ہے پیار کی اردو
عابی مکھنوئی

 

[زیرک]

بڑی شائستہ لہجے میں کسی سے اردو سن کر
کیا نہیں لگتا کہ ایک تہذیب کی آواز ہے اردو
گلزار

 

[زیرک]

میں نے رئیسؔ خدمتِ شعر و سخن جو کی
اس واسطے عزیز ہے اردو زباں مجھے

 

[رباب واسطی]

اردو جسے کہتے ہیں، تہذیب کا چشمہ ہے
وہ شخص مہذب ہے جس کو یہ زباں آئی

 

[زیرک]

مختصر سی اڑان والے ہیں
ہم کہاں آسمان والے ہیں
شعر پڑھیے میاں تلفظ سے
لوگ اردو زبان والے ہیں

 

[زیرک]

آج جمیل الدین عالی جی کا یومِ وفات ہے، مرحوم کے ایصالِ ثواب کیلئے دعا کیجئے گا۔
ایک دوہا

اردو والے، ہندی والے، دونوں ہنسی اڑائیں
ہم دل والے اپنی بھاشا کس کس کو سکھلائیں​

 

[جاسمن]

روٹھ کر اردو بولنے والے
مان جا، بات کر پنجابی میں

 

[زیرک]

تُو جانتا ہے ساری زبانیں تو کیا کروں
اردو میری زبان ہے اردو میں بات کر​

 

[زیرک]

سیکڑوں اور بھی دنیا میں زبانیں ہیں، مگر
جس پہ مرتی ہے فصاحت وہ زباں ہے اردو​

 

[زیرک]

مرے کانوں میں مِصری گھولتا ہے
کوئی بچہ جب اردو بولتا ہے​

 

[زیرک]

گو لاکھ ہو رنگت پھولوں میں خوشبو جو نہیں تو کچھ بھی نہیں
اس ملک میں چاہے ہُن برسے، اردو جو نہیں تو کچھ بھی نہیں
آنند نرائن مُلا​

 

[زیرک]

وہ عِطردان سا لہجہ مِرے بزرگوں کا
رچی بسی ہوئی اردو زباں کی خوشبو​

 

[زیرک]

بات کرنے کا حسیں طور طریقہ سیکھا
ہم نے اردو کے بہانے سے سلیقہ سیکھا​

 

[زیرک]

موجِ کوثر کی طرح نرم و رواِں ہے اردو
طبعِ دشمن پہ مگر پھر بھی گِراں ہے اردو​

 

[جاسمن]

جو یہ ہندوستاں نہیں ہوتا
تو یہ اردو زباں نہیں ہوتی
(عبدالسلام)

 

[جاسمن]

ﭼﮭﻮﭨﺎ ﺳﺎ ﺧﺎﻧﺪﺍﻥ ﮨﮯ ﺍﺭﺩﻭ ﻏﺰﻝ ﮐﺎ، ﺍﻭﺭ
ﺍﯾﮏ ﺍﯾﮏ ﮐﺮ ﮐﮯ ﺳﺎﺭﮮ ﺑﮍﮮ ﺟﺎ ﺭﮨﮯ ﮨﯿﮟ ﯾﺎﺭ

عمیر نجمی

 

[جاسمن]

اردو ہے مرا نام میں خسروؔ کی پہیلی
میں میرؔ کی ہم راز ہوں غالبؔ کی سہیلی

دکن کے ولیؔ نے مجھے گودی میں کھلایا
سوداؔ کے قصیدوں نے مرا حسن بڑھایا

ہے میرؔ کی عظمت کہ مجھے چلنا سکھایا
میں داغ کے آنگن میں کھلی بن کے چنبیلی

اردو ہے مرا نام میں خسروؔ کی پہیلی
غالبؔ نے بلندی کا سفر مجھ کو سکھایا

حالیؔ نے مروت کا سبق یاد دلایا
اقبالؔ نے آئینۂ حق مجھ کو دکھایا

مومنؔ نے سجائی مرے خوابوں کی حویلی
اردو ہے مرا نام میں خسروؔ کی پہیلی

ہے ذوقؔ کی عظمت کہ دیے مجھ کو سہارے
چکبستؔ کی الفت نے مرے خواب سنوارے

فانیؔ نے سجائے مری پلکوں پہ ستارے
اکبرؔ نے رچائی مری بے رنگ ہتھیلی

اردو ہے مرا نام میں خسروؔ کی پہیلی
کیوں مجھ کو بناتے ہو تعصب کا نشانہ

میں نے تو کبھی خود کو مسلماں نہیں مانا
دیکھا تھا کبھی میں نے بھی خوشیوں کا زمانہ

اپنے ہی وطن میں ہوں مگر آج اکیلی
اردو ہے مرا نام میں خسروؔ کی پہیلی

اقبال اشہر

 

[جاسمن]

لب سے پھول کھلیں بات سے خوشبو آئے
ایسی بولی وہی بولے جسے اردو آئے

 

[جاسمن]

‏کتنی تلخی ہے تیرے لہجے میں
جیسے اردو سے آشنا ہی نہ ہو

 

[شہباز خالدؔ کلکتوی]

چاہتا ہوں مرے اشعار کی خوشبو پھیلے
میری کوشش ہے خدا مجھ سے بھی اردو پھیلے
شہباز خالدؔ کلکتوی